E fundit!

16:34 Aktualitet

Dosja "Toyota Yaris"/ GJKKO dërgon për gjykim me themel ish-oficeren e BKH

Gjykata e Posaçme ka dërguar në gjyq dy të pandehurit në d...

Analiza/ Milani humbi trenin e fundit, Conceicao me "valixhe në duar"

28 Shkurt 2025, 23:00, Sport CNA

Analiza/ Milani humbi trenin e fundit, Conceicao me "valixhe në

Humbja ndaj Bolognas, e dyta radhazi, i ka dhënë një goditje të rëndë shpresave të Milanit për një vend në Champions League. Kuqezinjtë mbeten në kuotën e 41 pikëve, plot 8 pikë larg nga vendi i katërt. Duke marrë si referencë kuotën e 70 pikëve si pragun minimal për një vend në elitën e Europës, Milanit i duhen edhe 29 pikë nga 36 të mbetura. Një objektiv tepër i vështirë edhe për një skuadër që lufton për titull, e jo më për një ekip që nuk ka treguar vazhdimësi në rezultate.

Përmbysja e pësuar ndaj Bolognas ka vulosur edhe dështimin e projektit të trajnerit Serxho Kosensao. Nëse Milani nuk arrin të sigurojë një vend në Champions, as një triumf i mundshëm në Kupën e Italisë nuk do ta shpëtonte teknikun portugez nga shkarkimi. Stoli i tij tashmë është nën presion të madh dhe ditët në vijim mund të sjellin një ndarje të papritur mes tij dhe klubit. Ky dështim nuk është vetëm përgjegjësi e Kosensaos, por edhe e drejtuesve, përfshirë Zlatan Ibrahimoviçin, të cilët tentuan të “shpëtonin” sezonin me afrime të rëndësishme në merkaton e janarit. Gimenez, Felix, Walker, Sotil dhe Bondo u sollën për të forcuar ekipin, por deri tani nuk kanë dhënë efektin e pritur, duke bërë që ndërhyrjet e klubit të duken më tepër si një “arnim i keq” sesa si zgjidhje e vërtetë.

Në mesin e zhgënjimeve të mëdha të Milanit, një emër spikat veçanërisht dhe ai është Joao Felix. Sulmuesi portugez, i ardhur me shumë pritshmëri, është bërë simboli i një ekipi që “do, por nuk mundet”. Që nga mbërritja e tij, ai ka qenë gjithmonë titullar, përveç debutimit në Kupën e Italisë, e cila ironi e fatit, është edhe e vetmja ndeshje ku ka shënuar. Për t’i bërë vend, Kosensao ka sakrifikuar herë Rafael Leaon e herë Cristian Pulisiç, por Felix ende nuk ka arritur të bëhet vendimtar. Kur ka topin në këmbë, duket sikur mund të krijojë diçka, por në realitet i mungon ajo lëvizje vendimtare që të justifikojë praninë e tij në fushë. Në përpjekje për të integruar Felix, trajneri ka bërë ndryshime të tjera në skuadër, siç është spostimi i Reijnders më në thellësi të mesfushës. Holandezi ka qenë një nga mesfushorët më të rrezikshëm për gol këtë sezon, por ndryshimi i rolit e ka kufizuar kontributin e tij ofensiv.

Një tjetër zhgënjim është Santiago Gimenez. Fillimi i tij në Milano ishte premtues, por me kalimin e javëve ka humbur shkëlqimin. Në ndeshjen ndaj Bolonjës, ai shpërdoroi një mundësi të artë shënimi, ndonëse dha një asist për Leaon. Përtej kësaj, sulmuesi meksikan ishte pothuajse inekzistent në pjesën tjetër të lojës, duke prekur shumë pak topa dhe duke mos pasur ndikim në manovrën e ekipit. Conceicao mund të përdorë si alibi faktin që nuk ka pasur shumë kohë për të punuar me ekipin, por disa gabime individuale i kanë kushtuar shtrenjtë Milanit. Si pasojë e kësaj situate, Champions League duket gjithnjë e më e paarritshme për Milanin dhe e ardhmja e trajnerin në pankinë është gjithnjë e më e pasigurt. Nervozizmi i tij i shtuar në javët e fundit është një tjetër sinjal i qartë i tensionit që mbizotëron brenda klubit. Nëse rezultatet nuk përmirësohen shpejt, një ndryshim në pankinë mund të jetë i pashmangshëm. Sezoni që nisi me ambicie të mëdha po rrezikon të shndërrohet në një tjetër dështim të dhimbshëm për kuqezinjtë.