E fundit!

08:48 Kronika

Aksident i rëndë në aksin Kardhiq-Delvinë/ Humb jetën një person, plagosen tre të tjerë

Një aksident i rëndë ka ndodhur në aksin Kardhiq-Delvinë, ...

Vetmia, sfida më e madhe e të moshuarve

3 Shtator 2025, 12:04, Sociale CNA

Muajt e fundit, qyteti i Korçës është përballur me një realitet të dhimbshëm. Dhjetëra të moshuar janë gjetur të pajetë në banesat e tyre, pa asnjë njeri pranë. Vetmia dhe mungesa e kujdesit po kthehen në problem shqetësues, që po bëhet gjithnjë e më i dukshëm vitet e fundit. Rasti më i fundit është shënuar dje, kur një 70-vjeçar u gjet pa jetë në shtëpinë e tij.

Kostika Zdruli

Sipas specialistëve, kjo dukuri lidhet me ndryshimet e mëdha sociale dhe familjare. Kostika Zdruli, punonjës social pranë Rezidencës së të Moshuarve në Korçë, tregon se përditë përballen me histori vetmie.

"Shohim çdo ditë që të moshuarit janë më të vetmuar. Pjesa më e madhe e tyre janë të vetmuar për arsye të ndryshme. Mund të jenë beqarë, të divorcuar, raste që nuk kanë pasur fëmijë, raste që fëmijët u kanë vdekur. Kemi raste që janë të braktisur dhe pjesa tjetër janë në emigracion, ku fëmijët kanë dashur t'i marrin me vete, por të moshuarit janë kthyer në qytetin e tyre, pra nuk kanë dashur të jetojmë jashtë shtetit."

Kërkesat për strehim në rezidencë janë të shumta, por kapacitetet janë minimale, vetëm 31 vende në dispozicion për gjithë qarkun. Kjo ka bërë që shumë të moshuar të presin me muaj, madje me vite, në listat e pritjes.

"Kërkesat janë shumë të larta dhe kapaciteti ynë është i vogël në raport me kërkesat e qarkut sepse kërkesa kemi nga e gjithë Shqipëria, por ne jemi kufizuar në Qarkun e Korçës. Kërkesat janë shumë të mëdha në raport me numrin 31 që kemi të disponueshëm. Ka shumë të moshuar që presin gjatë në listë."

Një sfidë tjetër gjithnjë në rritje është përballja me demencën.

"Vështirësia më e madhe që shohim në vitet e fundit është që janë shtuar shumë personat me demencë dhe këtë kategori nuk e mbulojmë dot gjithmonë sepse këtu është një komunitet miks me persona që nuk kanë probleme me demencën. Personat me demencë kanë çrregullime të ndryshme të sjelljes dhe varet çfarë problematikash të tjera sjell kjo sëmundje. Shohim që demenca ka prekur shumë persona të moshës 60-65 vjeç dhe vështirësitë janë shumë të mëdha për t'i strehuar."

Vetmia, sfida më e madhe e të moshuarve
Tragjedia e vetmisë shihet shpesh edhe nga punonjësit që kujdesen për të moshuarit nëpër banesa.

"Punonjësit që shkojnë për kujdes në shtëpitë e të moshuarve janë dëshmitarë të shumë rasteve tragjike. Shoferi ka ndodhur që ka gjetur shumë persona që kanë ndërruar jetë, ndoshta edhe disa orë, pasi ai është larguar nga banesa. Shohim shumë raste që kanë pasur nevojë për ndihmë urgjente mjekësore ku me stafin e rezidencës kemi shkuar për ta ndihmuar ose kemi lajmëruar familjarët."

Në këtë realitet, shpëtim për shumë të moshuar është fqinjësia dhe lidhjet e afërta njerëzore. Një përshëndetje në mëngjes, një trokitje në derë, shpesh bëhen ura që i mbajnë të lidhur me jetën.

"Miku apo familjari më i mirë që kanë të moshuarit është ai që kanë pranë shtëpisë, njeriu më i afërt që mund të vërejë nëse del prej banese apo i thotë 'mirëmëngjes'. Kemi shumë raste që fëmijët i vëzhgojmë prindërit e tyre edhe me kamera, raste ku komunikojnë shpesh me të moshuarit nëpërmjet telefonit. Mendoj se duhet bërë diçka për të gjetur një mënyrë që të identifikohen personat e vetmuar."

Fenomeni i të moshuarve të vetmuar po kthehet në një nga plagët më të rënda sociale të ditëve tona, duke kërkuar më shumë kujdes, vëmendje dhe politika konkrete për t’u dhënë atyre dinjitet dhe siguri në vitet e fundit të jetës./CNA