Maratona e bebeve në Pogradec/ Edicioni i dytë i aktivitetit të veçantë, në Pogradec

28 Korrik 2024, 22:04, Sociale CNA

Maratona e bebeve në Pogradec/ Edicioni i dytë i aktivitetit të

Maratona e Bebeve ne Pogradec

Dy ditë më parë në qytetin e Pogradecit u mbajt eventi më interesant në gjithë Shqipërinë, i njohur si Maratona e Bebeve.

Në edicionin e saj të dytë në qytetin liqenor, gara mes bebushave kulmoi këtë organizim, krahas aktiviteteve të ndryshme që u organizuan në 3 ditë radhazi. Një pjesëmarrje e madhe e rreth 100 bebushave të cilët kanë garuar në tre kategori, duke përfshirë bebet që ecin këmba-dorazi, bebet që kanë nisur të ecin dhe bebet që vrapojnë.

Për organizatorin, Eritan Kamolli, ky është një aktivitet i cili është zhvilluar edhe vitin e kaluar, por fakti që ka patur interes shumë të lartë nga prindërit, u soll edhe këtë vit por me ditë të shtuara. Kamolli tregon se ky nuk do të jetë viti i fundit, pasi po mendohet që të zgjerohet grupmosha e fëmijëve, dukë përfshirë edhe gara mes moshës 5-10 vjeç.

"Është një aktivitet që ne e kemi filluar që vitin e kaluar dhe këtë vit, duke parë interesimin e madh të prindërve, menduam ta shtrinim në tre ditë. Është një aktivitet ku marrin pjesë rreth 100 bebusha, të moshave të ndryshme dhe ata garojnë me motivin për tu kënaqur, argëtuar dhe shijuar këtë atmosferë të bukur. Sigurisht që nuk do të jetë viti i fundit, ne mendojmë që ky aktivitet do vazhdojë dhe të zgjerohet edhe më shumë në ditë dhe në kohë. Ne mendojmë që vitin tjetër të futim edhe maratonën e grupmoshave, nga mosha 5 deri në 10 vjeç, në mënyrë që të bëhet më e bukur edhe për prindërit edhe për fëmijët që ndjejnë kënaqësi në këtë aktivitet."

Pjesë e jurisë së eventit ka qenë edhe kampionia kombëtare e vrapimit, Pavlina Evro, e cila është shprehur mjaft e emocionuar dhe e kënaqur për pjesëmarrjen e saj në këtë aktivitet. Ndër të tjera, Evro tregon rëndësinë e madhë që kanë këto aktivitete për shkak se janë kontribues në brezat e ardhshëm.

"Padyshim që është një maratonë e këndshme për arsye se janë fëmijë nga 6 muajsh deri 24. Kjo është një parapërgatitje për brezat e ardhshëm që ne nesër ti shohim pas shumë vitesh në maratonën "Enkelana Night". Ne prindërit gjithmonë i drejtojmë fëmijët atje ku duan dhe ku kanë hapësira, e natyrshëm aty ku kanë kënaqësi për të bërë atë që duan. Padyshim që u ndjeva e emocionuar, edhe kur vraponin, edhe kur unë ndava çmimet. Është emocion i veçantë sepse ata janë fëmijë shumë të vegjël."

Dy nga bebushat fitues janë Nina Taçi dhe Aron Vako të cilët arritën të kapnin këmba dorazi vijën e finishit të parët. Me bebushat e tyre në krah, prindërit kanë treguar emocionet e veçanta që kanë përjetuar në këtë mbrëmje.

"Ndihemi shumë të lumtur. Djali fitoi në kategorinë e tretë, këmba dorazi. Aktivitete shumë të bukura e të këndshme për fëmijët tanë."

"Jam shumë i lumtur. Është hera e parë që merr pjesë pasi është edhe e vogël. Atmosfera e jashtëzakonshme, jemi të kënaqur, goca mori çmim të parë. E mendoja që do dilte e para dhe ja doli."

Ky event kaq i vecantë dhe unik në Shqipëri, tashmë kthyer në një traditë në qytetin e Pogradecit, ka terhequr vëmendjen e prindërve për fëmijët e tyre. Gjithashtu ky event mund të zbulojë edhe kampion të së ardhmes./ CNA