Vrasja e 14-vjeçarit/ Zhupa “përplaset” me Manastirliun në Kuvend

18 Nëntor 2024, 15:59, Politikë CNA

Vrasja e 14-vjeçarit/ Zhupa “përplaset” me Manastirliun

Deputetja e Partisë Demokratike, Ina Zhupa reagoi për sherrin në pranë shkollës “Fan Noli” në Tiranë, ku mbeti viktimë një i ri dhe u plagosën dy të tjerë.

Zhupa kërkoi në Kuvend dorëheqjen e ministres së Arsimit, Ogerta Manastirliu, ndërsa hodhi akuza ndaj ministrit të Brendshëm, Ervin Hoxha.

Ajo deklaroio se qeveria po bën vetëm propagandë, pasi sherri nuk u shmang nga oficerët e sigurisë.

“Një 14-vjeçar sapo ka humbur jetën, pasi është vrarë më thikë në derën e shkollës “Fan Noli”. Dua t’i shpreh ngushëllimet familjes, por dua të kuptoni se sa false dhe jashtë realiteti është projektbuxheti që ka një kapitull më vete për sigurinë në shkolla.

Se si në mes të Tiranës mund të humbësh jetën dhe nuk gjendet një oficer sigurie që të shmangi sherrin me thika në oborrin e shkollës. Paratë janë, por vetëm propaganda bëhet me sigurinë në shkolla.

Ministri Balla dhe ministrja Kushi shkuan shkollë më shkollë për paketën e sigurisë, por nuk e di ku e kanë arkivuar paketën Manastirliu bashkë me këtë ministrin e ri, Hoxha, që di të sjelli vetëm policinë për t’u përballur me deputetët dhe nuk e ka policinë për të mbajtur fëmijët tanë.

Manastirliu duhet japësh dorëheqjen dhe të ikësh me turp nga ky skandal, pasi keni dështuar që me psikologët në shkolla, te oficeret e policisë në shkolla”, u shpreh ajo.

Nga ana tjetër, Manastirliu kërkoi që ngjarja të mos përdoret për politikë, teksa tha se është tronditur nga sherri.

Ministrja deklaroi se kjo ngjarje është një thirrje për reflektim dhe për marrjen e masave më të forta.

“Jam e tronditur nga humbja e jetës së një 14-vjeçari jashtë ambienteve të shkollës “Fan Noli”, ndërkohë që policia po zbardh rrethanat e ngjarjes. Dhimbja është vërtetë e madhe. Është një ngjarje nga e cila duhet të reflektojmë. Na fton që si përfaqësues të qytetarëve të angazhohemi më shumë për ambient më të sigurt për fëmijët tanë. Të forcojmë edhe më shumë mekanizmat e parandalimit dhe ndërhyrjes së shpejtë, duke luftuar dhunën e të gjitha formave. Edhe ne kemi rolin tonë në këto seanca. Të jemi shembull të mos promovojmë gjuhën e urrejtjes ndaj njëri-tjetrit dhe të promovojmë vlerat e respektit për njëri-tjetrin”, theksoi Manastirliu./ CNA