VIDEO/ Si u ndryshua harta e landfillit të Tiranës, malet me plehra "pushtuan" 15 hektarë tokë

12 Dhjetor 2023, 15:22, Politikë CNA

VIDEO/ Si u ndryshua harta e landfillit të Tiranës, malet me plehra

Të martën, deputetja Monika Kryemadhi, firmosi "live" shtesë kallëzimin e drejtuar ndaj SPAK-ut për inceneratorin e Tiranës, pasi sipas saj Bashkia e Tiranës ka lejuar një ndërtim pa leje në 15 hektarë tokë.

Kryemadhi denoncoi se 15 hektarë është harta e depozitimeve jashtë territorit të landfillit, pra inceneratori ka marrë aq shumë pagesa nga kompanitë e ndërtimit, sa vetëm me depozitimet jashtë kufirit kanë mbushur një sipërfaqe me 15 hektarë tokë.

Partia e Lirisë publikoi edhe videon ku tregohet se si zona përreth landfillit të Tiranës u mbulua nga malet me plehra.

Kryemadhi, gjatë fjalës së saj, akuzoi kreun e Bashkisë Tiranë, Erion Veliaj se ka detyruar firmat e ndërtimit t’i paguajnë inceneratorit 60 milionë euro për dherat, por ato janë depozituar jashtë inceneratorit.

"Pas firmosjes së kontratës së inceneratorit të Tiranës, Bashkia Tiranë ndërmori veprime për të detyruar të gjithë ndërtuesit në Tiranë, që dherat e prodhuara nga ndërtimi, të ishin të detyruar t'i çonin në inceneratorin e Tiranës, kundrejt pagesës. Kjo gjë u denoncua dhe nga kryetari i shoqatës së ndërtuesve, në komisionin hetimor parlamentar. Hetimet e kryera nga Kryemadhi për inceneratorin e Tiranës, nxjerrin në pah se si inceneratori i Tiranës ka përfituar 60 milionë euro nga firmat e ndërtimit për depozitim dherash, ndërkohë që dherat janë hedhur jashtë landfillit, jashtë lejes së ndërtimit. Kjo për Kryemadhin përbën dy fakte skandaloze: 1. Bashkia Tiranë ka ndikuar përmes një skeme kriminale, që bizneset private të lidhura me bashkinë, pasi firmat e ndërtimit janë të lidhura që nga momenti i parë i marrjes së lejes deri në përfundim të punimeve me Bashkinë Tiranë, që të dërgonin para në llogarinë bankare të inceneratorit. Më pas këto para, nëse ndiqen mund të rezultojnë që janë dhënë nga inceneratori për llogari të drejtorëve të bashkisë apo dhe të zyrtarëve të qeverisë.
2. Inceneratori i Tiranës ka marrë pagesat, ndërsa dherat i ka depozituar jashtë lejes së ndërtimit. Roli i koncesionarit ka qenë përfitimi i pagesave dhe jo realisht depozitimi i dherave. Droni i teknologjisë së fundit që ka përdorur Kryemadhi, së bashku me llogaritjet e stafit të inxhenierëve pranë saj, tregojnë për Hortofoto me koordinata të qarta", u shpreh Kryemadhi./CNA