Tirana e dy samiteve/ Agim Nesho: Rama kërkon të pozicionojë veten si lider ballkanik

1 Mars 2024, 20:56, Politikë CNA

Agim Nesho

Diplomati Agim Nesho, në një intervistë me gazetaren Fabjona Pasho, për CNA TV, ka komentuar samitet e njëpasnjëshme të mbajtura në Tiranë gjatë kësaj jave.

Sipas Neshos, ky ishte samiti i dyshes Rama-Vuçiç për të reklamuar lidershipin e tyre autokrat, si properëndimorë.

"Samiti i Tiranës ishte i sponsorizuar për të treguar rolin e veçantë të kryeministrit shqiptar dhe për të promovuar iniciativat e vjetra, si Ballkani i Hapur, që janë të rëndësishme edhe për grupe interesi të SHBA por edhe fuqi rajonale, të cilat duan t’i zhvillojnë në kuadrin e figurave të njohura ndërkombëtarisht. Ishte i sponsorizuar për të ngritur rolin e tij si një figurë ndërkombëtare. Ky samit prodhoi një fitore të madhe të Vuçiçit në Tiranë, i cili nuk pranoi as sanksionet ndaj Rusisë, as rolin malinj të Rusisë në Ballkanin Perëndimor. Prezenca ruse për të minuar arkitekturën e mbrojtjes evropiane, rritjen e influencave të tyre në shtetet ballkanike, është mëse prezente. Ishte momenti i dobët i një politike, që qeveria e Ramës niset nga anët sipërfaqësore dhe jo nga thelbi. Prandaj ky samit i Ukrainës nuk ishte gjë tjetër veçse një samit i Edi Ramës dhe Vuçiçit, për të promovuar figurat e tyre si lidera ballkanikë, të cilët mendojnë edhe për Ukrainën", u shpreh ai

Diplomati theksoi se Ukraina ka nevojë urgjente për municion, megjithatë, Shqipëria ndryshe nga sa mori përsipër, nuk ka kapacitete për prodhimin e tyre.

"Kërkesa e Presidentit Zelensky është kambanë alarmi për vendet e fuqishme, përfshirë edhe SHBA-në. Nuk ka asnjë mundësi reale Ballkani të ketë një pordhim të tillë armatimi që të ndihmonte Ukrainën. Është e pamundur të fillojë tani, s'ka teknologji dhe infrastrukturë", deklaroi ai.

Edhe për samitin Be-Ballkani Perëndimor, Nesho u shpreh se lëvdatat e Brukselit duhen marrë me rezerva, pasi Bashkimi Europian po shkon drejt zgjedhjeve.

"Këta kërkojnë të mbajnë një qëndrim në dukje properëndimorë, por të luajnë interesat e tyre, duke e kthyer zonën e Ballkanit në një zonë të gjerë, të ndërthurjes së interesave si të Kinës, Turqisë, Rusisë dhe vendeve perëndimore. BE po e shikon integrimin e Ballkanit perëndimor si diçka të lidhur me gjeopolitikën dhe është në interesin e tij që këto vende sa më shpejt të futen në BE. Në Ballkanin Perëndimor ka interesa të ndryshme, klienteliste, korrupsion galopant. Politika ballkanike nuk do të futet në BE. Pretendon të bëhet sikur është promotor. Interesat e pushtetit të tyre janë në kontradiktë me Bashkimin Evropian", theksoi diplomati.

Agim Nesho komentoi edhe prezencën e Alex Soros tek të dy samitet, duke e quajtur si prepotencë për të treguar ndikimin e tij në rajon./ CNA