Teliti thirrje për protesë: Veliaj gllabëroi 30 milionë euro me "5D", sa 9 vite fonde të ndihmës ekonomike

17 Prill 2024, 16:52, Politikë CNA

Teliti thirrje për protesë: Veliaj gllabëroi 30 milionë euro

Dorian Teliti

Zv.kryetari i Këshillit Bashkiak Tiranë dhe njëkohësisht këshilltari për Ekonominë dhe Financat në Partinë Demokratike, Dorian Teliti, i ka bërë thirrje ditën e sotme qytetarëve të Tiranës, por veçanërisht familjeve që trajtohen me ndihmë ekonomike që të dalin ditën e premte, në orën 11:00, për të protestuar para Bashkisë së Tiranës.

Sipas Telitit, këto familje trajtohen me ndihmë ekonomike në nivele skandaloze, dhe se protesta e tyre duhet të jetë edhe kundër Erion Veliajt dhe drejtorëve të tij, të cilët gllabëruan 30 milionë euro me 5D-të e tyre strategjike.

Reagimi i Telitit:

2.2 milionë euro/vit për ndihmën ekonomike në Tiranë, përballë 30 milionë euro-t e 5D-ve strategjike. 5D gllabëron sa 9 vite fonde të ndihmës ekonomike në Kryeqytet.

Ironike duken pamjet e Kryebashkiakut të Tiranës kur e shikon që vesh një përparëse, merr garuzhden e mjerimit dhe mbush pjatat me ushqim për të varfërit e Tiranës nën fluksin e fotografëve dhe kameramanëve të kudogjendur.

Ironike kur shikon që Kryebashkiaku mundohet "të ndihmojë" të varfërit, ndërkohë që 5 drejtorët e tij nuk ndjekin hapat e "të madhit", përkundrazi.

Ironike kur mendon që shefi "mundohet e lodhet" për të ndihmuar të varfërit, por dalin disa drejtora "të pabindur" që veprojne me mendjen e tyre dhe "tradhëtojnë" filozofinë dhe besimin e shefit të madh duke vepruar e ngrënë mbrapa kurrizit të tij.

Ama kulmi i ironisë është raporti propagandë vs realitet. Cdo vit janë rreth 2300-2400 familje që trajtohen me ndihmë ekonomike në Bashkinë e Tiranës, për të cilët buxheti alokon 2.2 milionë euro në vit për pagesat e kësaj ndihme, ndërkohë nga ana tjetër na del në skenë 5D-ja që merr fap e fap plot 30 milionë euro (gjithmonë pa dijeninë e shefit).

A ka padrejtësi më të madhe sesa të luash e të bësh politikë me garuzhden e varfërisë, ndërkohë 5D bën kërdinë?

Ndaj i bëj thirrje cdokujt që nuk ka mundësi të ushqejë fëmijët e tij, cdokujt që varfëria i ka zënë rrënjë të thella në familjen e tij, të ngrihet e të protestojë të premten ora 11.00. Tirana dhe Shqipëria janë të keqadministruar dhe të vjedhur. Të gjithë bashkë para Bashkisë Tiranë për të kërkuar dorëheqjen e Kryebashkiakut Veliaj që në njërën dorë mban garuzhden e varfërisë e në dorën tjetër stilografin e Autoritetit Kontraktor të Bashkisë Tiranë.”/ CNA