E fundit!

10:46 Aktualitet

Skenarët e Erion Veliajt në protestën për Zvërnecin

Një protestë që parullën ka “Zvërnec”, por po t’i heqësh e...

SPAK, në kërkim të diplomës së humbur!

6 Shkurt 2025, 15:39, Politikë CNA

Opinion nga Lutfi Dervishi

Në një zhvillim që do t’i bënte xheloz edhe skenaristët e Hollywood-it, SPAK-u ka nisur një hetim epokal mbi një nga misteret më të mëdha të historisë shqiptare: a ka dhe, nëse ka, ku është diploma e maturës e Belind Këlliçit?

Ky hetim i thelluar, më intrigues se kodi i Da Vinçit dhe më i ndërlikuar se dosjet e Sigurimit, solli thirrjen e nëndrejtoreshës së shkollës “Harry Fultz” në prokurorinë speciale.

Kjo “diplomë”, me sa duket, është më e shenjtë se Kushtetuta dhe më e vështirë për t’u gjetur se thesari i Ali Pashë Tepelenës apo ai i pronarëve të inceneratorëve.

Këtu bëhet fjalë jo për krim intelektual në tentativë, por për krim të konsumuar të një të riu intelektual.

Burime të paidentifikuara brenda SPAK-ut bëjnë me dije se agjentët e Byrosë Kombëtare të Hetimit kanë sekuestruar të gjithë regjistrat e shkollës, listat e mungesave, fletoret e punëdores të shkollës fillore dhe, sipas po këtyre burimeve, është siguruar edhe ditari i një shoqe klase që mbante shënim se kush bënte kopje në provim. Operacioni i koduar “Maturanti i pamaturuar” është vetëm fillimi i një sage epike.

Disa burime konfidenciale brenda institucionit të akuzës thonë se është urdhëruar një analizë forensike e bojës së përdorur në diplomën e Këlliçit, për të zbuluar nëse është shkruar në vitin përkatës, apo është një falsifikim i rëndomtë me “Photoshop.” Për arsye sigurie, analiza do të bëhet në një laborator të një vendi partner!

SPAK, në kërkim të diplomës së humbur!

Paralelisht, një grup ekspertësh të mirëpërgatitur po shqyrton me lupë firmën e drejtorit të shkollës.

Fakti që Këlliçi ka mbaruar Universitetin në SHBA e bën investigimin edhe më kompleks, por lajmi i mirë është se hetimi ndodhet në një fazë të avancuar dhe, aktualisht, po procedohet me thirrjen e dëshmitarëve.

Nëndrejtoresha e shkollës, e thirrur në SPAK për të zbardhur këtë enigmë, u pa sot duke hyrë në godinën e prokurorisë me një dosje në dorë dhe një shikim të ngarkuar me përgjegjësi historike.

Për momentin ka vetëm pyetje:

Çfarë ndodhi realisht në "Harry Fultz"?

A është diploma një mit i trilluar për të trullosur tutkunët, apo testi i vërtetë për SPAK-un?

A mund të quhet një person SE është i arsimuar nëse nuk ka një copë letër që e vërteton këtë?

Pyetje më të rëndësishme se këto nuk janë bërë që nga koha kur Platoni ngriti dilemën e shpellës.

Megjithë debatin e nxehtë, një gjë është e qartë për të gjithë: pa u hedhur dritë mbi këtë mister, themelet e republikës nuk janë më të sigurta.

BE ka paralajmëruar se nëse nuk i shkohet deri në fund kësaj dosje, nuk do të hapen grup-kapituj të rinj dhe do të pezullohet puna me kapitujt 23-24 që lidhen me Gjyqësorin dhe shtetin e së drejtës.

SPAK-u ka hapur një numër të veçantë emergjence: 0800- 999 dhe qytetarët janë të ftuar për të dhënë çdo informacion rreth Belind Këlliçit që pretendon të ketë master në Harvard.

Ndërkohë, publiku pret me frymën pezull: dhe tri pyetje qëndrojnë mbi qafën e tij si shpata e Damokleut:

A do të gjendet diploma?

A do të rrëfejë nëndrejtoresha sekretin e madh?

Çfarë do të ketë episodi i ri i sezonit: “Krime intelektuale”.

Përgjigjet nuk janë të lehta, por një gjë është e sigurt: në Shqipëri askush nuk ka më nevojë për t’u abonuar në Netflix. Mjafton të shohësh lajmet.

Në fund të fundit, drejtësia vonon, por nuk harron… sidomos kur bëhet fjalë për një diplomë gjimnazi që rrezikon jo vetëm të sotmen, por edhe të ardhmen euroatlantike të kombit! /CNA