Si e çoi Basha në humbje opozitën/ Baçi flet për skenarin korruptiv

3 Shkurt 2023, 08:51, Politikë CNA

Si e çoi Basha në humbje opozitën/ Baçi flet për

Deputeti i PD-së, Luan Baçi, ka lëshuar akuza të forta drejt kryeministrit Rama lidhur me skandalin McGonigal.

I ftuar në emisionin “Ditë e re”, deputeti Baçi tha se skandali në fjalë vërtetoi se kemi pasur një opozitë të kapur prej vitesh në vend.

Baçi shtoi më tej se ish-kreu i PD-së, Basha, ishte kthyer në shërbëtor të Ramës, pasi një nga 4 njerëzit më të fuqishëm të FBI-së ishte korruptuar nga Rama dhe ka ndikuar në dëmtimin e opozitës.

Deputeti thellon më tej skandalin teksa thekson se Rama me paratë e shqiptarëve ka korruptuar politikanë dhe agjentë të tjerë të kundërzbulimit amerikan për të dëmtuar opozitën dhe për të mbajtur pushtetin.

“Ne kemi pasur një opozitë të kapur prej shumë vitesh, kjo është dëshmuar se Lulzim Basha ishte kthyer në shërbëtor të Edi Ramës. Një nga 4 njerëzit më të fuqishëm të FBI-së po ashtu ishte i kapur dhe i korruptuar dhe i ka shërbyer Edi Ramës në dëmtimin e opozitës. Rama ka përdorur paratë e taksapaguesve shqiptarë për të korruptuar politikanë dhe agjentë të lartë të kundërzbulimit amerikan me qëllimin e vetëm për të dëmtuar opozitën, si formë për të mbajtur pushtetin e tij", ka thënë ai.

Luan Baçi foli më tej edhe për protestën e 11 shkurtit, ku u shpreh se ajo do t’i tregojë vendin kryeministrit, duke shtuar se një protestë e vetme e fuqishme nuk mjafton, duke nënkuptuar që duhen të tjera më pas.

“Do të jetë një protestë që do t’i tregojë vendin këtij kryeministri. Por një protestë e vetme që mendoj se do të jetë e fuqishme, nuk është e mjaftueshme. Pasi qytetarët, shoqëria civile dhe kushdo tjetër që ka një zë duhet të ngrihen për t’i treguar vendin kësaj qeverie. Edhe mbrëmë doli në dy televizione i shfazuar duke u justifikuar me argumente bajate dhe të ulëta, që tregojnë se kemi një kryeministër të degraduar. Edhe operacioni i policisë për heqjen e kamerave është tregues se krimi bën ligjin në këtë vend dhe është sinjal i degradimit të shtetit nga kjo qeverisje e kurruptuar, që vë në rrezik edhe vetë sigurinë kombëtare me korrupsionin e saj", deklaroi deputeti demokrat, Luan Baçi./CNA.al