web counter
LEXO PA REKLAMA!

SHKARKO APP

App Store
Google Play

"Shtrini dorën çdo opozitari"/ Berisha: Duhet të përqendrohemi te programi që kemi

14 Mars 2025, 11:31, Politikë CNA

"Shtrini dorën çdo opozitari"/ Berisha: Duhet të

Kreu i PD-së, Sali Berisha, gjatë vizitës së tij në Elbasan në kuadër të Ditës së Verës është ndalur për të folur dhe për programin e PD-së për 4 vitet e ardhshme.

Berisha kërkoi nga eksponentët e partisë së tij që t’i shtrinin dorën çdo opozitari dhe të përqendrohen te programi i tyre duke ua përsëritur në çdo moment qytetarëve.

“Në tërësi, klima është shumë pozitive. Siç keni parë ju, listat janë mirëpritur gjerësisht. Por një gjë është e sigurt, që nuk kanë asnjë krahasim me listat e palës tjetër. Edi Rama ka sot dhjetëra prej tyre me dosje të rënda vjedhjesh, hajnish, përvetësim pronash. Ja ku jemi ne, opozitarë 12 vite.

Montuan procese politike dhe nxorën se janë persekutorë politikë. Ky është një avantazh shumë i madh për kandidatët e opozitës. Ne kemi të metat tona, por ne nuk kemi mëkatet e tyre. Ne kemi qëndruar 12 vite në opozitë dhe dalim sot para shqiptarëve të betuar që do punojmë për ta. Të betuar që do ndryshojmë jetën e tyre në qytet, fshat dhe kudo. Ne kemi një program që vërtet e transformon Shqipërinë.

Çfarë do t’u sugjeroja një gjë të dytë ju? Çdo fjali, çdo fjalë, çdo bisedë, ju do shpalosni programin e PD-së. Kurrë mos u lodhni me këtë. Ju do t'i thoni çdo qytetari që ne do vendosim minimumin jetik 200 euro. Me 200 euro, varfëria ekstreme nuk ekziston. Dhe po të merrni vendet e BE-së, ato nuk kanë varfëri ekstreme. Sepse këto japin pikërisht këtë.

Ne po e përgatisnim që në vitin 2013, por ne e humbëm pushtetin. Gjetëm 15 mijë familje në varfëri ekstreme dhe do t'u jepnim atyre minimumin e tyre që u duhej për të mos qenë në varfëri ekstreme. Tani ne do e vendosim këtë normë. Ne do t'u kthehemi me forcën më të madhe 3 muajt e parë njerëzve në nevojë.

Dhe njerëzit më në nevojë sot janë pensionistët, janë një e treta, më shumë se një e treta e kombit. Njerëz që kanë shkrirë jetën e tyre në ndërtimin e këtij vendi dhe tani ndihen të shpërfillur. 57 për qind e tyre nuk kanë pension të plotë, kanë pensione të pjesshme. Ndaj dhe në këto raste, zgjidhja është këputja e nyjes së rubikonit. Është vendosja e një minimumi jetik 200 euro. Ky është zotimi ynë i prerë.

Nuk mund të marrin pensionistët, ata që janë me rroga të ulëta, me të njëjtin çmim gjërat bazë. Atyre do t'u jepet karta e konsumatorit, për të cilën do t'u rikthehet e gjithë TVSH-ja e blerjeve dhe ushqimeve bazë. Nuk janë kaq pak, janë 450 euro, janë më shumë sa u përket pensionistëve, janë tri pensione të sotme. Janë afërsisht një rrogë minimale, pra nuk është një gjë e papërfillshme.

Bëjmë një gjë shumë të mirë, sepse të paktën nuk numërojnë kafshatën. Nuk mund të pranohet ky çmim nafte dhe kjo do të pasqyrohet te të gjithë qytetarët. Kështu që ne naftën, sepse nafta është një piramidë në Shqipëri, me 7 prill të vitit 2013, nafta në bursë 160 dollarë për fuçi, në tregun shqiptar 1400 lekë. Më 7 prill të vitit 2023, nafta në bursë 80 dollarë për fuçi, në tregun shqiptar 1800 lekë.

Pra, këtu është një piramidë e tmerrshme. Ky i ka vënë një taksë naftës më absurden. Po të marrësh për çdo litër naftë 1.1 euro, kjo është një taksë që nuk ekziston kund në këtë formë. Ndaj ne do ta ulim taksën e naftës dhe do ta sjellim naftën në çmimet që e shet Kosova. Kosova e merr naftën pothuajse tërësisht nga Durrësi dhe atje e shet 40 për qind më lirë.

Ka kontrabandë të jashtëzakonshme. Kosova me 400 e ca mijë automjete konsumon 630 mijë tonë naftë, kurse me 870 mijë automjete, konsumon 540 mijë tonë naftë. Këtu ka një kontrabandë që shkon të paktën në 300 mijë tonë. Të gjitha këto do luftohen sepse kontrabanda e naftës nuk bëhet pa qeverinë kurrë. Kështu që ne duhet të përqendrohemi me të gjithë kohën tonë, me qytetarët te shpjegimi, te programi që kemi, një program që përfill dhimbjet e qytetarëve”, tha Berisha./ CNA





Lajmet e fundit nga