E fundit!

19:02 Aktualitet

"Na e kaluan njëherë topin për shalësh"/ Rama nuk tërhiqet për investimin në Zvërnec

Kryeministri Edi Rama ndodhet në Malin e Zi, ku ka ndarë p...

Rama, njoftim nga Kuvendi: Të hënën i drejtohem Knesset-it

22 Janar 2026, 14:26, Politikë CNA

Kryeministri Edi Rama njoftoi nga foltorja e Kuvendit se të hënën e ardhshme do t’i drejtohet Knesset-it, Parlamentit të Izraelit, në një format të veçantë që u është rezervuar vetëm një numri shumë të kufizuar udhëheqësish botërorë.

Rama e cilësoi ftesën si një “nder të jashtëzakonshëm”, duke theksuar se do të flasë si Kryeministër i Shqipërisë në të njëjtin format që, sipas tij, i është ofruar më parë edhe Presidentit të Shteteve të Bashkuara, si dhe disa liderëve të tjerë të huaj në historinë e atij Parlamenti.

Sipas Kryeministrit, ky privilegj i veçantë nuk i takon vetëm atij personalisht apo shumicës qeverisëse, por përfaqëson një vlerësim për Shqipërinë në tërësi. Ai theksoi se kjo shumicë qeverisëse mbështetet nga shumica dërrmuese e shqiptarëve dhe se ftesa për të folur në Knesset u jep një dimension të posaçëm marrëdhënieve mes dy vendeve.

Rama shtoi se emrat e udhëheqësve të tjerë që kanë pasur këtë privilegj janë lehtësisht të verifikueshëm dhe se ky fakt e bën edhe më domethënëse ftesën drejtuar Shqipërisë.

"Tani në mbyllje, dua t'ju informoj se të hënën e ardhshme do të kem një tjetër nder të jashtëzakonshëm. Do t'i drejtohem Knesset-it, Parlamentit të Izraelit. Si Kryeministër i Shqipërisë, po pa lejen e këtyre, kuptohet, në të njëjtin format që u rezervua para disa kohësh Presidentit të Shteteve të Bashkuara, si dhe një numri tejet të kufizuar udhëheqësish të huaj në historinë e atij Parlamenti, emrat e të cilëve mund të gjenden lehtësisht, por i japin një përmasë krejt të posaçme privilegjit që më është bërë mua dhe kësaj shumice qeverisëse, që mbështetet nga shumica dërrmuese e shqiptarëve, por edhe vetë Shqipërisë, për të folur në atë kuvend.

Por duke qenë se në këtë rast lista është vërtet e shkurtër dhe kundërshtarët e bordit sapo e përfunduan numërimin me shumë pasion të të ftuarve në bord... 'jo janë gjithë vendet, jo s'është ky, është ai', a thua se numrat flasin ndonjë gjë të madhe për një vend si yni... Duke u përpjekur t'u thonë shqiptarëve se prania në Bordin e Paqes ishte diçka mekanike, automatike, pa asnjë lidhje me vlerat, me rolin, me reputacionin ndërkombëtar të Shqipërisë, se me mua s'bëhet fjalë, dua të nënvizoj se për Shqipërinë, për mua dhe për ne, konsiderohet nder çdo ftesë që nuk u bëhet të gjitha shteteve të botës", tha Rama./ CNA