Një oligark ka kërkuar të privatizojë ishullin e Sazanit?/ Niko Peleshi jep përgjigjen para deputetëve

27 Qershor 2022, 13:17, Politikë CNA

Një oligark ka kërkuar të privatizojë ishullin e Sazanit?/

Niko Peleshi

Ministri i Mbrojtjes, Niko Peleshi, i thirrur në Komisionin e Sigurisë u është përgjigjur pyetjeve të deputetëve të opozitës, të cilët e kanë thirrur për situatën e zjarreve në vend.

Ndër të tjera, ministri iu përgjigj deputetit të Partisë Demokratike, Ervin Salianji, i cili tha se ka zëra që një oligark ka kërkuar privatizimin e ishullit të Sazanit.

“Pritet të ketë zjarre, po ngaqë nuk i shuani dot dhe e merrni me të qeshur këtë punë, prandaj u kemi thirrur përpara. A keni dijeni, kërkesë, aplikim apo ndonjë formë të caktuar nga ndonjë kompani, oligark që kërkon në përdorim apo privatizim ishullin e Sazanit duke u kërkuar ta nxirrni nga plani juaj? A është e njëjta kërkesë edhe në Karaburun? Akuzat për Sazanin janë që zjarri është i qëllimshëm për t'i hapur rrugë ndërtimit të hoteleve. A ka kapacit qeveria të përballojë situatën nga zjarret këtë vit dhe cilat janë kapacitetet?”, tha Salianji.

Peleshi i mohoi këto zëra, duke thënë: “Nuk kemi asnjë kërkesë për privatizime të bazës. Nuk mund të privatizohet baza ndihmuese e Sazanit. Nuk ka kërkesë, indicie, privatizim. Nuk ka lidhje zjarri me ndonjë konspiracion për të hapur territore të reja për ndërtime.”

Peleshi sqaroi më tej se vendit nuk i leverdis të blejë avionë për shuarjen e zjarreve pasi janë të kushtueshëm.

“Thashë që nuk ka leverdis të kemi avionë për shuarjen e zjarreve. Sepse kushtojnë 50 milionë euro. Nuk thashë që s’kemi buxhet. Ne jemi nga vendet brenda NATO-s që jemi duke respektuar grafikun e 2% të buxhetit. Ka vende të zhvilluara që janë edhe më keq. Nuk thashë që s’kemi mundësi. Unë e kam për publikun. Ju luani me fjalët për të bërë politikë”, tha ai.

Ministri mohoi akuzat e deputetit demokrat se vitin e kaluar nuk ka pasur reagim për zjarret. Peleshi tha se reagimi ishte shembullor.

“Thatë që nuk pati reagim vjet për zjarret. Nuk është e vërtetë. Ka pasur një reagim shembullor. Kanë qenë disa helikopterë në veprim. Kemi pasur mbështetjen e mekanizmit europian të Mbrojtjes Civile. Kjo nuk do të thotë lypje. Është mekanizëm i vendeve të BE. Ne jemi partnerë. Nëse zjarret do të futeshin në Llogara do të prisnim shiun”, u shpreh ai.

Duke dhënë sqarime se këtë vit do të jenë pesë helikopterë në gatishmëri për të menaxhuar situatën e zjarreve. Gjithashtu ministri tha se brenda disa muajsh do të kenë katër helikopterë 'black hawk'./CNA.al