"Ndërtuesit në Shqipëri do të kontribuojnë për fondin e gjelbër”/ Rama: Zonat e mbrojtura, burim i qëndrueshëm ekonomik

5 Dhjetor 2025, 11:48, Politikë CNA

"Ndërtuesit në Shqipëri do të kontribuojnë

Kryeministri Edi Rama njoftoi se ka hyrë në fuqi një masë e re ligjore që detyron të gjithë ata që ndërtojnë në Shqipëri të kontribuojnë në fondin e gjelbër, një iniciativë që synon mbrojtjen e mjedisit dhe zhvillimin e qëndrueshëm.

Rama theksoi rëndësinë e përdorimit të teknologjisë, veçanërisht për riprodhimin e fidanëve, duke përfshirë edhe mundësinë e përdorimit të inteligjencës artificiale për të maksimizuar efikasitetin e këtij procesi.

“Kemi ndërhyrë ligjërisht për të sjellë një risi që sapo ka hyrë në fuqi lidhur me detyrimin e të gjithë atyre që ndërtojnë në Shqipëri që të kontribuojnë për fondin e gjelbër.

Një tjetër element i domosdoshëm është fuqizimi me teknologji dhe në aspektin e prodhimit të fidanëve. Ka sot mundësi të reja në këtë drejtim dhe plani i Ministrisë së Mjedisit është të shfrytëzojmë këtë mundësi si dhe mundësinë e pamatë të vënies në shfrytëzim të IA”, tha Rama.

Ai shtoi se zonat e mbrojtura nuk janë pengesë për zhvillimin ekonomik, por përkundrazi mund të jenë një burim i ri të ardhurash për komunitetet lokale. Shqipëria ka mbi 1 milion hektarë zonë të mbrojtur, dhe këto territore mund të administrohen më mirë për të nxjerrë potencialin e tyre ekonomik pa dëmtuar natyrën.

Sipas kryeministrit, Agjencia për Zonat e Mbrojtura ka katërfishuar të ardhurat në 3-4 vitet e fundit, kryesisht përmes sistemit elektronik të menaxhimit të të ardhurave, dhe ky model do të shtrihet në të gjithë territorin.

Rama theksoi gjithashtu lidhjen e këtij fokusimi me përpjekjet për antarësimin e Shqipërisë në BE dhe synimin për të mbyllur negociatat teknike në 2027. Ai vuri në dukje se kërkesat dhe standardet mjedisore janë maksimale, duke nënvizuar nevojën për një ekonomi të re, të bazuar te natyra, që do të ketë rol kyç në zhvillimin e qëndrueshëm të vendit.

“Një gjë tjetër që koha e ka treguar më së miri, por duhet të përpiqemi ta tregojmë edhe më mirë për njerëzit është fakti që zonat e mbrojtura nuk janë penguese të zhvillimit ekonomik dhe të ardhurave.

Duhet të administrohen si duhet në aspektin e mbledhjes së të ardhura. Të ardhurat nga zonat e mbrojtura mund të jenë të konsiderueshme dhe mund të funksionojnë si një burim i ri i atyre komuniteteve që jetojnë brenda atyre territoreve. Ne kemi mbi 1 milion hektarë të përfshira në territorin e përgjithshëm të zonave të mbrojtura.

Nuk mjafton ta thuash këtë në mënyrë të përgjithshme, ajo që duhet është futja më thellë dhe në mënyrë të detajuar brenda gjithë këtij territori që përmbledh në mbi 1 milion hektarë për të parë se si në çdo pjesë të tij potenciale e zhvillimit ekonomik janë po aty pa qenë nevoja për të ndërhyrë me zhvillime që më shumë dëmtojnë sesa sjellin vërtetë zhvillim të qëndrueshëm në një afat të gjatë.

Agjencia për Zonat e Mbrojtura ka katërfishuar të ardhurat e veta vetëm në periudhën e 3-4 viteve të fundit. Po të shikosh nga vijnë të ardhurat kuptohet që potenciali është më i madh. Vijnë nga tri pika.

Sistemi i menaxhimi elektronik të të ardhurave ka sjellë hap cilësor që e bën të domosdoshme shtrirjen e këtij sistemi në të gjithë territorin.

Dua të them që në këto vite që kemi përpara që përkon me momentin historik të përpjekjeve për antarësim dhe me synimin e shpallur për të mbyllur negociatat teknike me BE-në në 2027 fokusi te mjedisi, pyjet dhe zonat e mbrojtura, fuqizimi i një ekonomie të re të bazuar te natyra do të jetë shumë më i madh sesa sot dhe për shkak se sfida që lidhet me ato pjesë të negociatave që prekin mjedisin është më e vështira nga të gjitha se kërkesat dhe standardet janë maksimale. Përtej përmirësimeve, po të nisim nga kemi filluar jemi shumë mbrapa po të llogarisim se ku duhet të mbërrijmë dhe ku do të mbërrijmë në një kohë shumë të shkurtër”, deklaroi kryeministri./ CNA