Manjani: SPAK-u të nxjerrë provat për Berishën ose ta lërë të lirë

21 Prill 2024, 19:27, Politikë CNA

Manjani: SPAK-u të nxjerrë provat për Berishën ose ta

Ish-ministri i Drejtësisë, Ylli Manjani

Ish-ministri i Drejtësisë, Ylli Manjani, ka reaguar ashpër ndaj SPAK-ut në lidhje me akuzat e ngritura ndaj ish-kryeministrit Sali Berisha.

Me anë të një statusi në rrjetet sociale, Manjani thotë se SPAK-u duhet të nxjerrë provat për fajësimin e Sali Berishës e ta çojë në gjykatë për gjykim, në të kundërt ai thekson se duhet ta lërë të lirë në veprimtarinë e tij.

Ai deklaron se nuk ka kuptim logjik që kryetari i PD-së të mbahet i shkëputur nga veprimtaria parlamentare, pasi pretendon se nuk mund ta pengojë hetimin.

Ish-ministri nënvizon se me Sali Berishën SPAK-u e ka tepruar dhe ka kaluar çdo limit logjik e ligjor.

Deklarata e plotë:

SPAK ose të nxjerrë provat për fajësimin e Sali Berishës e ta çojë në gjykatë për gjykim, ose ta lërë të lirë në veprimtarinë e tij.

Nuk shkon më kjo punë!

U bë bajat fare.

Kanë hetuar për 3 vite me radhë, po hyjnë në muajin e 5-të që e mbajnë tjetrin nën masë absurde, krejt joproprocionale sigurie.

Tani nuk ka më kuptim, në asnjë lloj llogjike të mbahet i shkëputur nga veprimtaria parlamentare një deputet dhe, veprimtaria politike një kryetar partie. Aq më tepër i partisë më të madhe opozitare.

Ç'kuptim ka mbajtja me dhunë e një politikani opozitar jashtë detyrave të tij politike?!

Si e dëmton apo pengon hetimin Ai?! Vetëm nëse hetimi është politik, i hetuari mund ta pengojë atë...

Nga ana tjetër, insistoj, pas 3.5 vitesh hetime një prokuror ose çon çështjen në gjyq me akuzë e prova, ose e pushon hetimin.

Zakonisht, kur nuk gjen gjë për 3 vite hetim nuk ke ç'gjen më. Aq më tepër në rastin e korrupsionit, i cili është çështje flagrance, e jo interpretimi ngjarjesh apo rrethanash...

Ky hetim është filluar mbi një kallëzim, ku kallëzuesi duhet të ketë referuar prova konkrete. Nëse nuk ka referuar prova, ose referimet janë të rreme duhet të hetohet kallëzuesi për kallëzim të rremë.

Por e lemë këtë të fundit, se ndoshta SPAK nuk e ka në rradhë për tani.

Me Sali Berishën e kanë tepruar. Kanë kaluar çdo limit llogjik, ligjor po e po.

Le pastaj me Jamarbër Malltezin dhe Fatmir Bektashin, të cilët mbahen nën hetim , madje edhe me masa sigurie, sepse kanë marrë pronën e tyre dhe e kanë zhvilluar!!!

Kjo llogjikë nuk qëndron më./ CNA