E fundit!

15:45 Aktualitet

46 ditë protestë/ Mbahet sot tubimi i radhës kundër qeverisë

Pasditen e sotme në Tiranë para Kryeministrisë mbahet prot...

Klodiana Lala vë me shpatulla pas murit Agron Shehajn: Nisma juaj nuk ka asnjë vlerë te qytetarët

27 Mars 2026, 08:57, Politikë CNA

Klodiana Lala vë me shpatulla pas murit Agron Shehajn: Nisma juaj nuk ka

Një përplasje e fortë mes gazetares Klodiana Lala dhe Agron Shehajt lidhur me nismën për mbledhjen e 100 mijë firmave në mbështetje të drejtësisë, ka ndodhur në emisionin “Të Paekspozuarit”.

Gjatë diskutimit, Lala e cilësoi këtë iniciativë si një aksion pa efekt real për qytetarët, duke e konsideruar atë thjesht një lëvizje propagandistike në funksion të interesave politike të Shehajt.

Ajo theksoi se mbledhja e firmave nuk sjell asnjë ndryshim konkret në sistemin e drejtësisë dhe shërben vetëm për të rritur profilin publik të forcës politike që ai përfaqëson.

“Nuk kanë asnjë efekt real. Më thuaj cili është efekti që sjell në sistemin tonë?”, u shpreh Lala, duke insistuar se nisma është më shumë një strategji për mbijetesë politike sesa një veprim me ndikim real.

Nga ana tjetër, Shehaj pranoi se iniciativa nuk ka vlerë juridike, por e mbrojti atë si një formë sensibilizimi publik. Sipas tij, mbledhja e firmave synon të tregojë para opinionit vendas dhe ndërkombëtar se qytetarët shqiptarë mbështesin drejtësinë.

“Është një dëshmi, një sensibilizim”, deklaroi Shehaj, duke e krahasuar nismën me protestat që, sipas tij, nuk kanë gjithmonë efekt të drejtpërdrejtë, por shërbejnë për të ngritur ndërgjegjësimin.

Debati mes tyre u tensionua më tej, kur Lala këmbënguli se nisma është thjesht një mjet për të qëndruar në skenën politike dhe për të siguruar vota, ndërsa Shehaj e kundërshtoi këtë deklaratë, duke kërkuar që të mos minimizohet rëndësia e sensibilizimit publik.

Debati në studio

Klodiana Lala: Nuk kanë asnjë efekt real. Më thuaj cili është efekti real që sjell në sistemin tonë? Me këto firma çfarë arrin?

Agron Shehaj: Kush të tha se ka ndikim juridik apo real? Një protestë çfarë rezultati ka? Është një dëshmi, sensibilizim.

Klodiana Lala: Pra, lëvizje politike që tregon se jeni në treg, propagandë për forcën tuaj politike, kaq.

Agron Shehaj: Kam thënë unë se ka vlerë juridike?

Klodiana Lala: Zotëri, kjo e gjitha është lëvizje për të qëndruar në treg si forcë politike. Mirë bën, të jesh në domeinin publik dhe të marrësh vota. Por efekt real në sistem apo te qytetarët nuk ka.

Agron Shehaj: Çfarë efekti real thua? Jepu kuptim fjalëve që thua.

Klodiana Lala: Jam shumë e qartë, kërkon ta shmangësh. Thuaju qytetarëve pse keni mbledhur këto firma.

Agron Shehaj: Për t’i treguar opinionit publik dhe ndërkombëtarëve, se shqiptarët janë me drejtësinë. Pse nuk të pëlqen kjo?

Klodiana Lala: Nuk më impononi dot mendimin tuaj dhe lëvizjen tuaj. Çfarë ju thanë amerikanët zoti Shehaj kur ju dërguat 100 mijë firmat?/ CNA