web counter
LEXO PA REKLAMA!

SHKARKO APP

App Store
Google Play

“Do të jem deputet pas zgjedhjeve”/ Meta flet nga qelia: Fushatën do e drejtoj vetë, më kanë motivuar!

30 Janar 2025, 22:09, Politikë CNA

“Do të jem deputet pas zgjedhjeve”/ Meta flet nga qelia:

Ish-presidenti dhe kryetari i Partisë së Lirisë, Ilir Meta me anë të një letre nga qelia, theksoi se fushatën zgjedhore ai do ta drejtojë prej andej ndërsa shtoi se kjo situatë në të cilën gjendet, vetëm sa e ka motivuar më shumë.

Në një intervistë të emisionit "Debat" me Alba Alishanin në A2Cnn, Meta u shpreh se objektiv kryesor mbetet përmbysja e “Narkoregjimit” dhe për këtë do të bashkëpunojë me PD-në.  

“Partia e Lirisë do të jetë një opozitë e vërtetë gjithmonë dhe për këtë qëllim do të bashkëpunojë me PD në interes të mbrojtjes të pluralizmit politik, interesit kombëtar e publik dhe rivendosjes së llogaridhënies.

Në emër të PL, Sekretari i Përgjithshëm z. Tedi Blushi është i ngarkuar të ndjekë bashkëpunimin me opozitën, ashtu si edhe Kryetari i KDK, z. Edmond Haxhinasto. Në cdo rast unë do të jem deputet i atyre që më kanë besuar e votuar që nga viti 2005 e në vazhdimësi.

Por, objektivi im kryesor është përmbysja e Narkoregjimit ku shteti jo vetëm është shkrirë me Partinë, siç e kanë pohuar edhe OSBE – ODIHR, por ku shteti drejtohet nga një organizatë kriminale siç e dëshmoi me fakte edhe ish-zv. Kryeministri Ahmetaj.

Por, kjo situatë është vetëm motivuese për mua dhe PL për të luftuar me vendosmëri për t’iu rikthyer lirinë dhe dinjitetin të gjithë shqipatëve që vetëm fizikisht nuk janë në burg dhe që vetëm të lirë nuk ndihen në vendin e tyre, në punën e tyre, në biznesin e tyre dhe jetën e tyre.

11 Maji është një datë historike që i thërret të gjithë shqiptarët e ndershëm e patriotë të bashkojnë të gjitha përpjekjet në mënyrë që fëmijët e tyre të mos mbeten pa Atdhe apo që të mos ndihen të huaj e të shtypur në tokën e të parëve të tyre.

Partinë e Lirisë dhe fushatën e saj e drejtoj unë si President i zgjedhur i saj në prillin e kaluar në bashkëpunim me të gjithë kolegët dhe forumet e saj. Po kështu programi ynë është është bërë publik që në 27 Prill 2024.

Gjithashtu, kriteret për kandidatët për deputetë janë miratuar në mënyrën më transparente nga Komiteti Drejtues Kombëtar dhe secili do vlerësohet sipas performancës në këtë betejë vendimtare me “Narkoregjimin”.

Objektivi kryesor është fitorja e opozitës dhe padyshim që përfaqësimi i PL- së do të jetë shumë dinjitoz”, tha Meta. /CNA





Lajmet e fundit nga