"Do të heqim aspektin penal për gazetarët"/ Rama: "Kazan" termi i duhur, ndaj u ka ngelur në mendje

16 Dhjetor 2025, 11:25, Politikë CNA

"Do të heqim aspektin penal për gazetarët"/ Rama:

Kryeministri Edi Rama, në Konferencën për të Drejtën e Informimit, është ndalur dhe te media online. Rama tha se ka pasur një vetëdegjenerim gjithmonë e më të madh në median online.

Kryeministri deklaroi se media online është kthyer në një territor ku po veprojnë dhe forcat jomiqësore me BE-në.

Më tej kryeministri tha se në 24 vendet e BE-së shpifja dënohet penalisht, ndërsa Shqipëria do ta heqë aspektin penal për gazetarët.

Rama gjithashtu u ndal dhe te termi “kazan” i përdorur prej tij disa vite më parë për median. Term për të cilin Rama tha se derisa mbahet mend ende do të thotë se është termi i duhur.

“Për median online u bë një nam i zi për lirinë, për demokracinë. U futëm dhe në kanalet e disa vendeve strikte, që na e lanë si gozhdë aty, ligji i medies, ligji i medies. Kërkoheshin disa gjëra shumë elementare dhe mundësia për të ditur se kush po ua lexon librin e shtëpisë. Nuk ka pasur vetërregullim, por ka pasur vetëdegjenerim gjithmonë e më të madh. Ne hoqëm dorë dhe nuk kemi ndërmend të rivëmë dorë derisa BE t’i ketë thirrur mendjes. Të gjithë po e shohin që gjëja po del komplet jashtë kontrollit. Media online është bërë një territor ku ndërhyjnë dhe forcat jomiqësore me BE-në. Normal nëse ti shtëpinë e lë pa dritare, pa çati dhe pretendon të flesh rehat atëherë beson në një botë që nuk ekziston. Ne do të bëjmë diçka që 24 vende të BE-së nuk e kanë. Në 24 vende të BE-së shpifja dënohet penalisht. Ne do të heqim aspetin penal për gazetarët. E di që nuk do të vihet te meritat në raport me lirinë, e kam shumë të qartë që nuk do të na e numëroni si gjest pozitiv.

'Kazani' është një term i vitit 2017. Ngaqë ka qenë termi i duhur u ka ngelur në mendje. Ky ka qenë dhe qëllimi, që të mos ketë nevojë t’ua thuash më. Po të pyesësh dhe sot popullin, e konfirmon. Ne do të bëjmë termin e shpifjes për gazetarët. Jo për të zgjedhurit, kush zgjidhet nga populli duhet të dënohet nëse shpif. Kush informon për ne të zgjedhurit nga populli, duhet të shpifë pa u dënuar”, tha Rama./CNA