Berisha në detyrim paraqitje/ Reagon Balla: Ky është vetëm fillimi, kam folur për 11 vite

2 Nëntor 2023, 22:39, Politikë CNA

Berisha në detyrim paraqitje/ Reagon Balla: Ky është vetëm

Ministri i Brendshëm, Taulant Balla

Ministri i Brendshëm, Taulant Balla, është pyetur mbrëmjen e kësaj të enjteje në lidhje me akuzat e ngritura ndaj ish-kryeministrit Sali Berisha dhe për masën “detyrim paraqitje” për çështjen e privatizimit të ish-kompleksit “Partizani”.

Balla tha se nuk i lejohet të flasë për këtë çështje, pasi u shpreh se është prokuroria dhe gjykata që duhet të dëgjohen në këto momente.

Ai deklaroi në një intervistë televizive se për çështjen “Partizani” ka folur për 11 vite dhe veprimet e SPAK janë rezultat i reformës në drejtësi.

Ministri theksoi se askush nuk do të falet, pasi ky është vetëm fillimi.

“Në aspektin profesional nuk më lejohet të flas për këtë çështje sa kohë që unë kam folur, 11 vite me radhë për atë çështje. Të shumtë ishin ata që nuk më besuan dhe më është dashur ta bëj 3 apo 4 herë kallëzimin duke pasuruar me informacione dhe le të jetë prokuroria e gjykata ata që duhet të flasin. Por një gjë ua them çdo qytetari, PS ka mbështetur një reformë drejtësie që të garantonte goditje korrupsioni edhe majtas edhe djathtas, dhe e vërteta është që falë kësaj reforme ne sot jemi në kushtet që persona që deri para pak ditësh konsideroheshin të paprekshëm nga drejtësia sot janë nën akuzë.

Ky është vetëm fillimi, prandaj duhet që çdo person ndaj të cilit ngrihet një akuzë të heqë dorë nga një sjellje banale e sulmit kundër institucioneve të drejtësisë. Kjo drejtësi e re që ka lindur plotësisht mbi ato gërmadha të drejtësisë së vjetër, duhet të ketë besimin e të gjithëve dhe prandaj PS ka vendosur një standard të pakundërshtueshëm. Më gjeni një rast të një sulmi të ndonjë përfaqësuesi të PS kundër institucioneve të reja të drejtësisë. Për të mos bërë më pas krahasimin me qasjen që kanë sot individë të caktuar që sulmojnë institucionet e drejtësisë. Është e rëndësishme të kuptojmë që jo vetëm rasti i kompleksit Partizani, por plot dosje të tjera të vjetra, shpresoj dhe besoj që edhe ato do të jenë, sikurse edhe ngjarje për të cilat për mua ka një ngarkesë të veçantë, dhe vrasjet e 21 janarit është një ngjarje që bën pjesë në detyrat e shtëpisë së drejtësisë së re për t’i dhënë një përgjigje”, nënvizoi Balla./ CNA