Begaj cakton datën/ Ja kur do të mbahen zgjedhjet parlamentare

5 Dhjetor 2024, 15:58, Politikë CNA

Begaj cakton datën/ Ja kur do të mbahen zgjedhjet parlamentare

Presidenti Bajram Begaj

Presidenti Bajram Begaj ka nxjerrë këtë të enjte dekretin për datën e zgjedhjeve parlamentare.

Begaj ka vendosur që zgjedhjet të mbahen të dielën e 11 majit 2025.

Presidenca në një njoftim ka shpjeguar edhe arsyet e zgjedhjes së kësaj date.

Presidenca thotë se shkaku për caktimin e datës 11 maj 2025 si datë për mbajtjen e këtyre zgjedhjeve qëndron në nevojën e shprehur nga KQZ-ja për të shfrytëzuar të gjithë kohën në dispozicion për përgatitjen e infrastrukturës ligjore dhe organizative, me qëllim që të bëhet i mundur votimi i sukseshëm dhe rezultativ i shqiptarëve nga jashtë vendit.

Gjithashtu, në njoftim thuhet se Samiti i 6-të i Komitetit Politik Evropian (EPC) nuk do të mbahet në 8 dhe 9 maj në Tiranë siç ishte parashikuar, por do të shtyhet pas zgjedhjeve të 11 majit, për të mos ndikuar në fushatën zgjedhore.

"Partia Demokratike dhe një pjesë e konsiderueshme e partive parlamentare i paraqitën Presidentit shqetësimin, se planifikimi i samitit të 6-të të Komitetit Politik Evropian (EPC) për datat 8 dhe 9 maj të vitit 2025, dy ditë para datës së fundit të mundëshme për zhvillimin e zgjedhjeve, formon ndikim dhe avantazh të papranueshëm për qeverinë, si dhe cënon ndjeshëm parimin e barazisë së armëve që kërkon Kodi Zgjedhor për fushatën zgjedhore.

Pa vënë në diskutim lejueshmërinë ose jo të një veprimtarie të tillë, sepse kjo është kompetencë ligjore e KQZ-së, Presidenti i Republikës bashkohet në qëndrimin, se zhvillimi nga ana e qeverisë i një takimi të kësaj natyre në finalen e fushatës zgjedhore, me pjesëmarrjen e jashtëzakonshme të lidershipit politik evropian, nuk mund të jetë pa ndikim në caktimin e datës së zgjedhjeve.

Për këtë arsye, Presidenti i Republikës, pasi bëri të gjitha verifikimet e nevojshme me autoritetet kompetente të Shqipërisë, mori zyrtarisht sigurimet, se aktiviteti i mësipërm do të zhvillohet pas zgjedhjeve parlamentare, fakt ky i konfirmuar për Presidentin e Republikës edhe nga interlokutorët ndërkombëtarë.

Konfirmimi zyrtar si më sipër heq rezervën e shprehur nga Partia Demokratike dhe nga pjesa tjetër e partive parlamentare ndaj datës 11 maj 2025 dhe e bën këtë datë të pranueshme dhe të pëlqyeshme për të gjithë faktorin politik", thekson Begaj.

Kujtojmë se kjo datë u propozua nga PS-ja dhe KQZ-ja gjatë konsultimeve të Presidentit me partitë politike./ CNA