E fundit!

09:49 Kosova & Bota

Kurti: Kosova nuk kishte nevojë për këto zgjedhje, rezultati e dëshmoi qartë

Kryeministri në detyrë i Kosovës, Albin Kurti u shpreh në ...

Pragu antikushtetues i notës mesatare lë studentët pa shkollë e shkollat e larta pa studentë

12 Tetor 2023, 09:03, Opinione Jak Simoni

Pragu antikushtetues i notës mesatare lë studentët pa

Foto ilustruese - Politekniku

Siç pritej, filloi dhe një vit akademik me ulje të ndjeshme të numrit të studentëve në shkollat e larta dhe jo vetëm. Ndonëse kushtetuta, jo vetëm jona, përcakton të drejtën e studimit për të gjithë studentet që kanë dëshirë dhe merita, kuotat në universitete digjen nga pragu i notës mesatare si për të hyrë në shkollë të lartë.

Prej vitesh ndodh ky absurditet dhe kjo padrejtësi, ndërkohë që askush nuk e ngre zërin. Akoma më paradoksal është fakti se dhe llogaritja e mesatares së maturantëve bëhet me vendim qeverie.

50% të mesatares e kanë kopjet në provimin e maturës shtetërore që barazojnë dhe tejkalojnë rezultatet e atyre nxënësve që lodhen për vite të tëra, ndonëse dhe aty ka nota fiktive të ndikuara nga kurset e ndërhyrjet nga më të ndryshmet si miq, drejtues, pushtetarë etj.

Madje dhe ata që kanë mbaruar prej vitesh maturën, dhe me nota të mira, duhet të ribëjnë provimin e maturës për të konkurruar për shkollë të lartë. Ky kriter zhgënjen të rinjtë në momentin më të bukur të jetës së tyre dhe ndikon në zbrazjen jo vetëm të universiteteve, por dhe të Shqipërisë. U jep një arsye për t'u larguar dhe atyre të rinjve që kanë mëdyshje.

Paradoksalisht e kanë më të mundur të studiojnë në vende të tjera që kanë arsimin më mirë se ne. Madje disa shkojnë për të studiuar në Kosovë, që nuk ka asnjë të keqe, po të ishte se nuk shkojnë për detyrim dhe gjithashtu të vijnë më shumë nga Kosova për të studiuar këtu.

Studentët le të studiojnë ku të duan e ku të munden, por të mos jenë të detyruar për kritere absurde. Ky kriter ka thelluar ndarjen, për mos me thënë hendekun, sipas gjinisë dhe sipas profesionit në shkolla e për rrjedhojë në shoqëri. Akoma më paradoksal është se e bën një qeveri që mbahet si e majtë, për të cilën formimi do të ishte parësor krahasuar me profesionalizmin apo specializimin e verbër për një rol të automatizuar në mekanizmin ekonomik.

Nuk mundet një vendim qeverie të ndajë një herë e përgjithmonë kush bën dhe kush nuk bën për shkollë. Të hiqet sa më parë pragu i notës mesatare për të studiuar në shkollë të lartë. Të rinjtë le të zbulojnë dhe të zhvillojnë interesat dhe pasionet e tyre për dije, e mbi të gjitha të ndërtojnë të ardhmen dhe në vendin e tyre, të paktën një pjesë.

Filozofi i shquar grek i qetësisë shpirtërore, Epikuri, do të tmerrohej nga shkollat tona. Ai pranoi skllevërit në shkollë, ndërsa sot pengohen “të lirët”; ata po prodhojnë më shumë skllevër të punës, sesa njerëz.