E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

“BABAI” TJETËR…

6 Tetor 2024, 10:57, Kulturë Agim Xhafka

Agim Xhafka

U çudita kur vajza te kasa e bankës më tha, duhej të dorëzoja tek ajo një certifikatë familjare.

-E merr kollaj tek e-Albania. Një klik e ke, -buzëqeshi.

Ishte e premte e ora po shkonte tre mbasdite. Ngaqë do ikja jashtë Tirane iu luta të më nxirrte ajo një certifikatë. E kishte lehtë se kompjuterin e kishte para syve. Sa i dhashë numrin tim personal ma printoi shpejt e shpejt.

-Të bëra dy kopje, -tha.

Ndërsa një e mori ajo tjetrës i hodha një sy. Lexova emrin tim dhe ngjitur “Abejdin”.

-Kush është ky Abejdini? -e pyeta.

-Babai juaj, kush tjetër? -qeshi goca.

-Ati im nuk quhet kështu. Quhet Alajdin, -i fola pak ashpër. -Printo një certifikatë tjetër, -gati i thashë si me urdhër.

Ngaqë do isha vrenjtur shumë në fytyrë ajo u tremb siç duket dhe e printoi sërish. Dy copë. Ia rrëmbeva nga dora e lexova te rubrika atësia sërish emrin “Abejdin”.

-Babain ma quajnë Alajdin, -përsërita, ngula këmbë dhe gërthita.

Gruaja që e di sa e dua unë Alajdinin tim, si çdo fëmijë prindin e vet, më tërhoqi për xhakete. Eja të ikim d.m.th.

-Kështu e keni të shënuar këtu, nuk është faji im, -tha goca e tregoi kompjuterin.

E vërtetë. Ajo nuk kishte faj. Po dhe babai im qe pa faj. Fare pa faj. Ndërrimi i emrit të tij, tani që ai nuk rron, m’u duk krim. Krim i rëndë dhe shumë i shëmtuar.

-Si Alajdin, si Abejdin paratë njësoj do t’i keni në bankë. As do t’u shtohen, as do t’u pakëson ato, -foli goca te kasa.

Ndërkohë m’u duk vetja si ata që shkojnë te emisioni i Gjebresë. Ata që kërkojnë të gjejnë prindërit e vërtetë. Ndërsa mua po më ndodh e kundërta. Më humbi ati im e më ka birësuar ky “Abejdini”. Në gojë ndieja hidhësi. Fytyra duhej të më ishte bërë e verdhë. Më dukej sikur ja, sa të ikja nga banka, do më dilte babai para e do më thoshte:

-Po si më ndërrove me baba tjetër, o bir? Si?

Kurrë nuk mendoja se do kisha ngjitur me emrin tim një emër tjetër si baba. Me vrap hyra te zyrat e gjendjes civile te lagjja. Për fat i kapa, gati po e mbyllnin.

-Që ta rregullosh të duhet një certifikatë lindje e babait tënd dhe një familjare po e tij. Pastaj sille te ne, ne ia çojmë e-Albania e ata bëjnë korrigjimin.

Ndërsa po i ngulisja këto në tru gruaja fishkëlleu:

-Fiu, gjithë këto sorollatje!

E pashë me inat. Heshti.

-Pa babai im ka 28 vjet që ka ndërruar jetë. Ai ka lindur në Korçë e ka vdekur në Korçë.

-Aty do shkosh. Tek arkiva e gjejnë dhe të japin certifikatat.

-Ok, -fola dhe nisa të zvarritem drejt shtëpisë.

Në kokë më trokiste emri “Abejdin”. Si tokmak që ma bënte kafkën plagë. E dija që qe gabim njerëzor, por më dukej si pjesë filmi me aksion kur sulen ca banditë me maska dhe rrëmbejnë babain. Shokun tim më të ngushtë, atë që kur më përqafonte aromën te qafa e kishte si e blirit poshtë ballkonit.

-Nesër që pa u gdhirë do iki për Korçë, -i thashë gruas.

-Është punë që pret, mos u nxito, -tha ajo.

-Pret puna, por nuk pret babai.

Sa do i thosha:

-Moj e kupton që e kanë marrë peng babain, e kupton që ma kanë ndërruar babain, e kupton që gjithë ditën mund të thuash ish-burri, ish-gruaja, por nuk thua dot ish-babai.

Në fakt nuk më kishte faj ajo. Ndaj gjeta ca fjalë më të buta si përgjigje.

-Nesër për Korçë do shkoj patjetër. Do ta marr babain e ta vendos në vendin që i takon. Ta kem përjetë ngjitur me emrin tim se ky “Abejdini” sikur më kruan trupin, sikur më lëviz trurin. Kupton? Kështu e do dinjiteti i atij burri dhe i mbiemrit që na ka lënë. Se një certifikatë me emrin tim dhe pa babain, por me një “Abejdin” ngjitur është njësoj si p.sh. të shkoj në një ditëlindje me një tufë lulesh artificiale në dorë, dhe jo me lule natyrale.

Kaq fjalë dhe heshta. Heshta deri të nesërmen. Kur ndeza “Jeep”-in e ia mbatha për Korçë pa dalë ende dielli.

-Më prit baba, -fola me vete e i dhashë gaz.

Ndërkohë te pasqyra mbi kokë m’u shfaq si pëllumb në fluturim certifikata e re. E bardhë, e bukur dhe me germa të dukshme. Ku shkruhej: “Agim Alajdin Xhafka”.