Zbardhen detaje nga atentati ndaj Selami Brahimit/ Autori, xhaxhai i gruas

12 Shkurt 2024, 10:46, Kronika CNA

Detaje të tjera kanë dalë në dritë në lidhje me atentatin e pak ditëve më parë në shkodër ku mbeti i plagosur Selami Brahimi.

Policia e Shkodrës ka bërë identifikimin e autorit të atentatit dhe bëhet fjalë për shtetasin S.K, 68 vjeç, xhaxhai i gruas së tij.

Sipas informacioneve paraprake mësohet se ka pasur një konflikt mes dy familjeve i cili është rindezur pas vdekjes së një personi në familje.

68-vjeçari dyshohet se ka qëlluar nga një automjet tip "Skoda Fabia" ngjyrë e bardhë të cilën e kishte marrë me qira në aeroportin e Rinasit.

Ky automjet pas ngjarjes nga këqyrja e kamerave të sigurisë u gjet i parkuar në lagjen “Rus” në Shkodër dhe brenda saj edhe arma e zjarrit automatik kallashnikov. Brenda mjetit u gjetën 8 gëzhojat e automatikut ndërsa një gëzhojë u gjet në vendin e ngjarjes e cila është e njëjtë më gëzhojat brenda automjetit, provë e cila çoi në zbardhjen e kësaj ngjarjeje.

Shtetasi Sulejman Kapllani mësohet se u arrestua në Gjermani dhe pritet të ekstradohet.

S. K. njihet si person me precedentë penalë, ndërsa i plagosur po ashtu është dënuar për veprën penale trafik të lëndëve narkotike.

Konflikti mes dy të afërmve

Shtetasi M.K. është vjehrri i të plagosurit Selami Brahimi dhe u nda nga jeta në janar të këtij viti, por edhe vëllai i autorit të dyshuar Sulejman Kapllani. Gjithçka nisi pas kësaj vdekjeje.

Musa Kapllani që prej vitit 2013 nuk fliste me dy vëllezërit e tij. Në 2013-ën vëllai i vogël Bërhan Kapllani vrau në Itali ish-bashkëshorten e tij Orjeta Boshi dhe të dashurin e saj Shpëtim Hana, ndërsa u dënua nga shteti italian me burgim të përjetshëm. Që prej asaj kohe Musa Kapllani ka ndërprerë marrëdhëniet me dy vëllezërit Sulejmanin, autori i dyshuar i plagosjes dhe Bërhanin, që u dënua për vrasjen e ish-bashkëshortes dhe një personi tjetër.

Pas vdekjes së Musa Kapllanit, familja e këtij të fundit nuk shkroi në letrën e njoftimit të vdekjes emrat e dy xhaxhallarëve, Bërhanit dhe Sulejmanit. Ky i fundit nga Italia ka debatuar lidhur me këtë çështje duke mos e pranuar dhe duke u ndier i fyer, debat në të cilin është përfshirë edhe i plagosuri.

Atentati i 8 shkurtit

S.K., 68 vjeç, ka pritur më shumë se një orë derisa Brahimi erdhi tek lokali i tij dhe sapo la mbesën e vogël në një pallat qëlloi në drejtim të 60-vjeçarit.

Ai qëlloi me breshëri plumbash ndaj dhëndrit të familjes.

Pas atentatit ai është kthyer në Berlin të Gjermanisë ku është arrestuar dhe tani pritet ekstradimi i tij.

Nga ana tjetër Selami Brahimi është shprehur se nuk e ka idenë se kush mund të jenë autorët e plagosjes së tij.

Pritet dhe dëshmia e shtetasi S.K., i cili është i dyshuari kryesor për plagosjen e burrit të mbesës./ CNA