web counter
LEXO PA REKLAMA!

SHKARKO APP

App Store
Google Play

E fundit!

x

“Telenovela” Martinaj/ Fati i “mbretit” të lojërave të fatit 5 muaj në errësirë, denoncimi që ngriti në këmbë policinë

31 Dhjetor 2022, 14:40, Kronika CNA

“Telenovela” Martinaj/ Fati i “mbretit” të

Që prej orës 8 të mbrëmjes së 9 gushtit, familjarët e Ervis Martinajt kanë shprehur se kanë humbur çdo kontakt me të.

Ishte xhaxhai i “mbretit” të lojërave të fatit, Faik Martinaj, ai i cili denoncoi zhdukjen e nipit të tij më 10 gusht në policinë e Kurbinit me dyshimet se mund t’i kishte ndodhur ndonjë gjë.

Pas raportimit për zhdukjen e mistershme të Martinajt, i cili ishte shpallur në kërkim nga policia, në media u publikuan video të këtij të fundit, i cili lëvizte në shoqërinë e Jeton Lamit, agjentit të Forcës Operacionale.

Bëhet fjalë për disa pamje filmike të një hoteli të njohur në Durrës, ku Jeton Lami kishte shoqëruar më 5 gusht me një automjet luksoz “Audi A8″, Ervis Martinajn së bashku me një miss shqiptar. Lami i ka prenotuar atyre një dhomë rreth orës 21:15, ndërsa Martinaj dhe missi janë larguar pak pas orës 10 të mbrëmjes.

Një ditë më pas, bossi i lojërave të fatit u pa në Tiranë në ambientet e një biznesi që ndodhet në zonën e “Zogut të Zi”.

Ky është edhe imazhi i fundit që policia, prokuroria dhe familjarët kanë për biznesmenin e lojërave të fatit.

Disa javë pasi në media “gëlonte” zhdukja e mistershme, mjeti i blinduar me të cilin lëvizte Ervis Martinaj u gjet pranë një karburanti në Rrugën e Kombit. Makina u sekestrua mbrëmjen e 21 shtatorit dhe dyshohet se ishte nisur në drejtimin e Kosovës.

Kush e nxori në pritë Ervis Martinajn

Por teksa fati i tij nuk është zbardhur ende, aludime të shumta janë ngritur për të.

Në dosjen hetimore të zbardhur nga gazetarja Klodiana Lala, thuhet se Martinaj është tradhtuar dhe nxjerrë në pritë nga një femër misterioze.

Këtë informacion, policia e Lezhës dhe Kurbinit e ka marrë nga një burim konfidencial, i cili ka deklaruar se i shumëkërkuari mund të jetë rrëmbyer dhe ekzekutuar.

Çështjen e Martinajt Prokuroria e Kurbinit e ka regjistruar për akuzën e rrëmbimit, por hetimet janë shtrirë në disa pista.

Pistat e hetimit dhe tezat e ngritura

Konkretisht Prokuroria po heton dy pista kryesore. E para, është ajo e inskenimit të zhdukjes dhe e dyta, ajo e rrëmbimit dhe vrasjes.

Shumë kanë aluduar se Martinaj ka inskenuar zhdukjeb e tij. Në një studio televizive, ish-komisari i policisë Dritan Zagani, tha se 2 muaj para zhdukjes Ervis Martinaj ka kontaktuar një kirurg plastik, një nga më të njohurit në Itali me origjinë shqiptare.

Nga ana tjetër, gazetari investigativ Artan Hoxha mendon se Ervis Martinaj është rrëmbyer nga persona të veshur si policë, të cilët e kanë ekzekutuar.

Të njejtën tezë beson edhe kreu i PD-së, Sali Berisha, i cili ka deklaruar në daljet e tij se trupi i “mbretit” të lojërave të fatit është ndarë në 6 pjesë.

Aktualisht prokuroria po vijon ende hetimet në lidhje me këto aludime dhe është e fokusuar edhe në qytetet ku mund të jetë zhdukur.

Dy qytetet kryesore në të cilat po zhvillohen hetimet janë Durrësi dhe Vlora, informacione po kërkohen edhe më gjerë, duke u shtrirë edhe në Itali dhe në Maqedoninë e Veriut.

Vetëm disa ditë më parë, më 26 dhjetor, forca të RENEA-s dhe FNSH-së zbarkuan për kontroll pranë banesës së Martinajt.

Gjatë kontrollit, policia ka gjetur dhe sekuestruar 2 armë zjarri automatike, 1 silenciator, rreth 7 mijë fishekë luftarakë të kalibrave të ndryshëm, për armë të lehta dhe të rënda, 85 predha eksplozive, 1 thikë bajonetë, 9 uniforma policie, 7 jelekë multifunksionalë, 11 kapele policie, 2 radio policie, fenelina policie, maskë gome për fytyrën dhe dokumente të ndryshme.

Por teksa po bëhen rreth 5 muaj nga momenti që biznesmeni i lojërave të fatit është denoncuar si i zhdukur, fati i Martinajt ka mbetur në errësirë./ B.A. – CNA.al





Lajmet e fundit nga