web counter
LEXO PA REKLAMA!

SHKARKO APP

App Store
Google Play

Policia kap dy “kriminelët” e Korçës/ Kishin mbushur plot një bagazh makine me dru

13 Tetor 2022, 16:18, Kronika CNA
Policia kap dy “kriminelët” e Korçës/ Kishin
Drutë e sekuestruar

Policia ka vijuar "superoperacionet" e kapjes së druve, në një kohë kur vendi gëlon nga ngjarjet kriminale dhe nga vrasjet.

Blutë e Korçës njoftojnë se sot kanë kapur dy “kriminelë” që kishin mbushur plot një bagazh makine dru.

Këtë “supersukses”, policia e ka shpërndarë menjëherë në media për ta reklamuar si një nga punët më të mira.

Kjo “arritje” vjen në të njëjtën kohë kur pothuajse çdo ditë mediat po raportojnë për vrasje, të cilat kanë mbetur pa i kapur autorët apo kanë qenë edhe ngjarje të paralajmëruara.

“Korçë/U kapën duke prerë dru në mënyrë të paligjshme, në zonë të mbrojtur, vihen në pranga 2 shtetas.

Sekuestrohet automjeti që do të transportonte sasinë e druve të prerë në mënyrë të paligjshme.

Në vijim të punës për parandalimin dhe goditjen e aktivitetit të paligjshëm të prerjes së pyjeve, specialistët për Hetimin e Krimeve të Komisariatit të Policisë Korçë bënë arrestimin në flagrancë të shtetasve:

- M. F., 45 vjeç (i dënuar më parë për veprën penale “Vjedhja”) dhe K. Dh., 23 vjeç, për veprën penale “Prerja e paligjshme e pyjeve”, kryer në bashkëpunim. 

Shërbimet e Policisë kanë kapur në flagrancë shtetasit M. F. dhe K. Dh., në zonën e mbrojtur “Parku Kombëtar i Bozdovecit”, duke prerë dru në mënyrë të paligjshme. Gjatë kontrollit të zonës është gjetur një automjet tip “Mitsubishi”, i ngarkuar me një sasi drush. Automjeti, i cili ishte në përdorim nga 45-vjeçari, u sekuestrua në cilësinë e provës materiale, së bashku me sasinë e druve të prerë në mënyrë të paligjshme.

Materialet i kaluan Prokurorisë pranë Gjykatës së Rrethit Gjyqësor Korçë, për veprime të mëtejshme”, thuhet në njoftim./ B.A. – CNA.al





Lajmet e fundit nga