E fundit!

18:57 Opinione Luan Rama

I PËGËRI I MBETUR GJALLË NGA NJË KOHË E VDEKUR

Në këto ditë të zhegëta vere, bashkë me rrjedhën kutërbues...

CNA zbuloi skandalin/ Policia fshehu krimin në Korçë

7 Korrik 2024, 11:17, Kronika CNA

Një tentativë vrasjeje u regjistrua më 19 qershor të këtij viti në aksin rrugor Korçë-Voskop.

Policia njoftoi asokohe se kishte pasur një sherr mes disa të rinjve, ku ishte dhunuar me sende të forta 18-vjeçari M. J. (Njoftimin e policisë më 19 qershor mund ta lexoni këtu)

CNA raportoi se kjo ngjarje kishte prapavijë. Burimet konfidenciale dhe informacionet e dëshmitarëve okularë pranë vendngjarjes, i thanë CNA-së se i riu ishte plagosur me thikë dhe kishte marrë një goditje në pjesën e sipërme të kokës.

Dëshmitarët okularë njoftuan CNA-në se dy prej autorëve kishin nxjerrë armën dhe kishin qëlluar drejt mjetit të 18-vjeçarit. (Lajmin e CNA-së më 19 qershor mund ta lexoni këtu)

Në vendngjarje pati gëzhoja, ndërsa makina u largua nga aty e dëmtuar nga plumbat, megjithatë, policia i fshehu në njoftimin zyrtar këto detaje duke manipuluar ngjarjen.

CNA zbuloi skandalin/ Policia fshehu krimin në Korçë

Policia e Korçës

Rreth 20 ditë pas krimit, policia ka konfirmuar CNA-në.

Policia e Korçës, këtë të diel pranon se ka pasur të shtëna me armë dhe deklaron se ngjarja nuk ka qenë një sherr i thjeshtë, por një tentativë vrasjeje.

Për këtë ngjarje janë arrestuar dy persona, 27-vjeçari A. D. dhe 51-vjeçari I. S., të dy banues në Korçë.

Njoftimi i plotë:

Korçë/Vijon me intensitet zbatimi i masave të përcaktuara në planin operacional mbarëkombëtar "Sundimi i ligjit".

Kapet dhe vihet në pranga 27-vjeçari i shpallur në kërkim, në lidhje me ngjarjen e ndodhur më datë 19.06.2024, ku në bashkëpunim me 4 shtetas të tjerë tentuan të vrisnin shtetasin M. J.

Arrestohet në flagrancë edhe një shtetas tjetër, i cili përkrahu 27-vjeçarin dhe posedonte në banesë armë zjarri me municion.

Procedohen penalisht edhe 2 të tjerë, të cilët fshehën provat materiale të kryerjes së krimit.

Sekuestrohen 1 armë zjarri automatike dhe municione luftarake.

Komisariati i Policisë Korçë, në zbatim të masave të planit operacional "Sundimi i ligjit", për kapjen e personave në kërkim dhe në vijim të punës hetimore për dokumentimin e plotë të ngjarjes së ndodhur më datë 19.06.2024, në lagjen nr. 17, Korçë, bazuar në informacionet e siguruara nga inteligjenca policore, mbi vendndodhjen e njërit prej shtetasve të shpallur lidhur me këtë ngjarje, kanë intesifikuar kontrollet për kapjen dhe vënien e tij përpara përgjegjësisë ligjore.

Si rezultat nga këto struktura në bashkëpunim me Forcën e Posaçme "Shqiponja" të DVP Korçë, u bë kapja dhe ndalimi i shtetasit në kërkim:

-A. D., 27 vjeç, banues në Korçë, pasi më datë 19.06.2024, në aksin rrugor "Korçë-Voskop", në bashkëpunim me shtetasit S. S., 25 vjeç, S. S., 33 vjeç, Dh. D., 33 vjeç, dhe M. B., 39 vjeç, banues në Korçë, me automjetin "Rang Rover" kanë përplasur automjetin me drejtues shtetasin M. J., 18 vjeç, të cilin dyshohet se kanë tentuar t'a vrasin duke e goditur me mjete të forta në dukje armë zjarri, e cila nuk ka realizuar qitje.

Në vijim të veprimeve të kryera po në lidhje me këtë ngjarje, u arrestua në flagrancë shtetasi:

-I. S., 51 vjeç, banues në Korçë, pasi ky shtetas dyshohet se ka përkrahur 27-vjeçarin A. D., me të cilin ka lidhje shoqërore. Nga kontrolli i ushtruar në banesën e shtetasit I. D., në lagjen nr. 4, Korçë, u gjetën dhe sekuestruan në cilësinë e provës materiale 1 armë zjarri automatike dhe 1 krëhër me 30 fishekë.

Gjithashtu po nga këto struktura filloi procedimi penal për shtetasit V. D., 62 vjeç dhe R. S., 44 vjeç, banues në Korçë, pasi dyshohet se këta shtetas kanë ndihmuar autorët e ngjarjes, të fshehin provat materiale, që kanë shërbyer për kryerjen e krimit.

Po punohet për kapjen dhe vënien përpara përgjegjësisë ligjore të shtetasve të tjerë të përfshirë në këtë ngjarje.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë./ CNA