E fundit!

11:24 Aktualitet

SPAK merr të pandehur ish-kryebashkiakun socialist

SPAK ka marrë të pandehur ish-kryebashkiakun socialist të ...

Atentati në Fushë Krujë/ Shoqërohet sërish Valter Bami

6 Korrik 2023, 22:06, Kronika CNA

Policia ka dhënë një informacion shtesë në lidhje me atentatin e regjistruar mesnatën e së hënës në fshatin Larushkë të Fushë Krujës, ku humbi jetën një person.

Blutë bëjnë me dije se 37-vjeçari Valter Bami është shoqëruar sërish në komisariat. Kjo, pasi në dorën e tij të majtë janë konstatuar faktorë plotësues të qitjes me armë zjarri.

Shoqërimi i Valter Bamit është kryer sot rreth orës 20:30, në fshatin Greps të Niklës.

Ndërkohë, grupi hetimor është duke kryer hetimet për dokumentimin e plotë ligjor të atentatit.

Kujtojmë se të shtënat me armë kishin si shënjestër Gentian Bejtjan, një eksponent të njohur të botës së krimit, i cili i shpëtoi për herë të tretë një atentati.

Nga plumbat mbeti i vrarë kunati i tij, Ramazan Sino dhe u plagosën dy djemtë e tij.

Njoftimi i policisë:

Në vijim të veprimeve hetimore në lidhje me ngjarjen e datës 03.07.2023, ku në fshatin Larushkë, Krujë, në oborrin e banesës së shtetasit G. B., është qëlluar me armë zjarri e si pasojë ka humbur jetën shtetasi R. S. Rreth orës 04:00 të po kësaj date, është shoqëruar shtetasi V. B., 37 vjeç, të cilit i janë marrë faktorët plotësues dhe deklarim në lidhje me ngjarjen e mësipërme e më pas është lënë i lirë, ju informojmë se:

Sot me datë 06.07.2023, bazuar në përgjigjen e aktit të ekspertimit kimik, ka rezultuar se në dorën e majtë të shtetasit V. B., janë konstatuar faktorë plotësues të qitjes me armë zjarri.

Mbi bazën e këtij akti ekspertimi, Prokuroria pranë Gjykatës së Shkallës së Parë të Juridiksionit të Përgjithshëm Tiranë ka lëshuar sot më datë 06.07.2023, urdhrin e ndalimit për këtë shtetas për veprën penale "Mbajtja pa leje dhe prodhimi i armëve, armëve shpërthyese dhe i municionit", parashikuar nga neni 278 i Kodit Penal.

Po sot, rreth orës 20:30, në fshatin Greps, Nikël, është lokalizuar, kapur dhe shoqëruar në ambientet e DVP Tiranë shtetasi V. B., 37 vjeç, banues në Nikël, Fushë Krujë.

Ndërkohë vazhdojnë intensivisht hetimet për dokumentimin e plotë ligjor të ngjarjes së mësipërme.