E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Zgjedhjet parlamentare në Portugali

10 Mars 2024, 21:03, Kosova & Bota CNA

Në Portugali po mbahen sot zgjedhjet e përgjithshme të parakohshme. Votuesit po u drejtohen qendrave të votimit për të zgjedhur nëse do të sjellin në pushtet qendrën e djathtë apo do të vazhdojnë të qeverisen nga socialistët e qendrës së majtë, edhe pse të dyja palët deri tani nuk duket të kenë mbështjetje për të siguruar shumicën.

Zgjedhjet vënë përballë dy partitë e qendrës, Partinë Socialiste (PS) dhe Partinë Social Demokrate (PSD).

Votimet e parakohshme mbahen 4 muaj pas dorëheqjes së papritur të kryeministrit socialist Antonio Costa në mesin e një hetimi për korrupsion që përfshinte shefin e kabinetit të tij. Ndaj zotit Costa nuk janë ngritur akuza.

Partia populiste Chega (Mjaft) ka shënuar rritje të mbështetjes dhe pritet të luajë një rol kyç në bisedimet pas zgjedhjeve në rast se forcës politike që fiton zgjedhjet do t’i duhet mbështetja e partive më të vogla për formimin e qeverisë së re.

Çështjet që kanë mbizotëruar fushatën në vendin më të varfër në Evropën Perëndimore përfshijnë pagat e ulëta, korrupsionin, koston e lartë të shtëpive dhe kufizimet për qasje ndaj kujdesit shëndetësor.

Më shumë se 10 milionë qytetarë kanë sot të drejtën për të votuar. Rezultatet e zgjedhjeve pritet të bëhen publike në mesnate.

Kryetari 46 vjeçar i Partisë Sicialiste, Pedro Nuno Santos, kandidat për kryeministër ka premtuar ndryshim, por ai nuk është distancuar nga anëtarët e vjetër të partisë që kanë shërbyer në qeveritë e mëparshme.

Kryetari i Partisë Social Demokrate, 51 vjeçari Luis Montenegro, i cili mund të bëhet kryeministër nëse fiton Aleanca Demokratike ka deklaruar se do të ndërtojë një qeveri me figura jo politike.

Kryetari i Partisë Chega, Andre Ventura ka bërë fushatë duke vënë theksin tek pakënaqësitë e votuesve ndërsa ka mbështetjen e të rinjve. Partia e themeluar 5 vjet më parë, siguroi një përfaqësues në parlamentin me 230 vende në vitin 2019.

Në zgjedhjet e 2022 ajo mori 12 vende dhe anketimet tregojnë se në zgjedhjet e sotme mund të marrë votat e mjaftueshme për të dyfishuar përfaqësimin në parlament./ VOA