E fundit!

18:12 Aktualitet

Nis protesta e pestë e qytetarëve në Tiranë

Mbahet ditën e sotme protesta e radhës e qytetarëve në Tir...

Trump: Akuza penale u ngrit për të ndërhyrë në zgjedhjet e ardhshme

5 Prill 2023, 07:45, Kosova & Bota CNA

Trump: Akuza penale u ngrit për të ndërhyrë në

Ish-presidenti Donald Trump

I rrethuar me flamuj të shumtë amerikanë, ish-Presidenti Trump mbajti një fjalim të stilit të fushatës para mbështetësve të shumtë në rezidencën e tij Mar-a-Lago në Florida, mbrëmjen e së martës.

Zoti Trump mbajti një qëndrim sfidues, duke cituar mes të tjerash, dy gjyqet e dështura në Kongres për shkarkimin e tij kur ishte president. Ai e quajti aktakuzën e ngritur ndaj tij në Nju Jork, si të fundit në “sulmet me hetime mashtruese”. “Ky rast i rremë (aktpadia) u ngrit vetëm për të ndërhyrë në zgjedhjet e ardhshme të vitit 2024 dhe duhet të mbyllet menjëherë”, tha zoti Trump.

“Nuk kam menduar kurrë se diçka e tillë mund të ndodhte në Amerikë”, tha zoti Trump. “Krimi i vetëm që kam kryer ka qenë mbrojtja pa frikë e vendit tonë ndaj atyre që kërkojnë ta shkatërrojnë atë."

Shumica e republikanëve që po kandidojnë për Shtëpinë e Bardhë ose që kanë në plan të shpallin kandidaturën kanë shprehur mbështetjen për zotin Trump. Përmes deklaratave ata janë shprehur se hetimet ndaj zotit Trump janë të motivuara politikisht.

Kryetari i Dhomës së Përfaqësuesve, republikani Kevin McCarthy, tha se ngritja e aktakuzës tregon se, “sistemi ynë i shenjtë i drejtësisë u përdor politikisht” kundër zotit Trump.

Përmes një shkrimi në rrjetin "Twitter", guvernatori DeSantis thotë se ngritja e aktakuzës ishte joamerikane.

“Përdorimi politikisht i sistemit tonë të drejtësisë për të avancuar një agjendë politike e kthen me kokë poshtë zbatimin e ligjit”, thuhet në postimin e zotit DeSantis në rrjetin "Twitter". “Prokurori i Qarkut të Manhatanit, i mbështetur nga Sorosi, ka deformuar vazhdimisht ligjin duke lënë të lirë kriminelët. Megjithatë, tani ai po tendos ligjin për të vënë në shënjestër një kundërshtar politik”, shprehet mes të tjerash zoti DeSantis.

Reagimet e zyrtarëve të zgjedhur demokratë lidhur me ngritjen e akuzave ndaj zotit Trump kanë qenë të pakta, përfshirë Presidentin Joe Biden.

“I pandehuri, Donald J. Trump, falsifikoi të dhënat e biznesit në Nju Jork për të fshehur një përpjekje të paligjshme për të minuar integritetin e zgjedhjeve presidenciale të vitit 2016, si dhe shkelje të tjera të ligjeve zgjedhore”, tha ndihmësprokurori i qarkut, Christopher Conroy.

Për herë të parë në histori, një ish-president i Shteteve të Bashkuara të Amerikës është paraqitur në gjykatë si i pandehur nën akuza penale.

Prokurorët thonë se zoti Trump u përpoq të ndikonte te rezultati i zgjedhjeve presidenciale të vitit 2016 duke u përpjekur të bllokonte lajmet që mund ta dëmtonin kandidaturën e tij dhe më pas duke fshehur natyrën e vërtetë të pagesave për të blerë heshtjen.

Akuzat penale rrjedhin nga tri raste të veçanta, ku ish-presidenti dhe bashkëpunëtorët e tij akuzohen se kanë bërë pagesa për të blerë heshtjen e tre individëve gjatë fushatës së tij presidenciale në vitin 2016.

Pagesat, thotë aktpadia, u bënë për të blerë heshtjen e dy grave që pretendojnë se kanë pasur marrëdhënie intime me zotin Trump, shumë vite më parë, dhe një pagesë për të blerë heshtjen e një punonjësi të kullës Trump, i cili pretendonte se zoti Trump kishte një fëmijë në një lidhje jashtëmartesore.

Zoti Trump është akuzuar për 34 vepra penale të falsifikimit të të dhënave të biznesit. Më herët, të martën, ai u dorëzua pranë autoriteteve në Nju Jork dhe deklaroi se ishte i pafajshëm ndaj të gjitha akuzave.

Republikani Trump e ka portretizuar rastin e Nju Jorkut dhe tri hetime të veçanta nga Departamenti i Drejtësisë dhe prokurorët në Xhorxhia, si të motivuara politikisht.

Prokurori Alvin Bragg u pyet gjatë një konference shtypi se pse e kishte ngritur padinë pikërisht tani dhe nëse momenti kishte prapavija politike. Prokuroi i qarkut tha se zyra e tij kishte “prova shtesë” që nuk i kishte paraardhësi i tij. “Unë ngre padi kur janë gati”, tha ai.

Gjykatësi nuk dha urdhër që çështja të mos diskutohet në publik, por e paralajmëroi zotin Trump që të shmangte komentet që mund të nxisin trazira civile. Nëse gjendet fajtor për ndonjë nga 34 akuzat për krime, zoti Trump mund të përballet me një maksimum prej katër vitesh burg, por ka të ngjarë të dënohet më pak.

Gjykatësi caktoi seancën e radhës me datën 4 dhjetor. Avokatët e zotit Trump kërkuan që ai të përjashtohej nga pjesëmarrja personalisht në seancë për shkak të sigurisë së jashtëzakonshme që kërkohet. Prokurorët kërkuan që gjyqi të caktohet në janar, disa javë para votimeve paraprake të kandidatëve republikanë për zgjedhjet presidenciale të vitit 2024. Avokatët e zotit Trump kërkuan që gjyqi të shtyhej për në pranverë. Gjykatësi ende nuk ka caktuar një datë, sipas njoftimeve, deri në momentin e publikimit të artikullit./ Voa