LEXO PA REKLAMA!

SHKARKO APP

E fundit!

x

Sholc: Gjermania do t’i dërgojë armë Ukrainës për aq sa është e nevojshme

21 Qershor 2022, 15:55, Kosova & Bota CNA
Sholc: Gjermania do t’i dërgojë armë Ukrainës për
Kancelari gjerman, Olaf Sholc

Gjermania do t’i dërgojë armë Ukrainës për aq sa është e nevojshme, tha kancelari gjerman Olaf Sholc, ndërsa shtoi se është e qartë se Ukraina i përket Europës. Udhëheqësi gjerman tha se vendi i tij do të angazhohet që Ukraina të marrë statusin e vendit kandidat për anëtarësim në Bashkimin Europian.

Kancelari gjerman Olaf Sholc u zotua se vendi i tij do të vazhojë të ndihmojë Ukrainën përmes dërgesave të armëve, për aq kohë sa do të jetë e nevojshme. Zoti Sholc shtoi se pas vizitës së tij në Kiev javën që shkoi, e ka edhe më të qartë se Ukraina i përket Europës.

“Është e qartë se ne do të vazhdojmë mbështetjen me armë për Ukrainën. Do të vazhdojmë për sa kohë Ukrainës i duhet ndihma jonë”, tha udhëheqësi gjerman në një fjalim në Federatën e Industrive Gjermane “BDI” në atë që njihet si “Dita e Industrisë”.

“Ukraina na përket ne, i përket familjes europiane”, shtoi zoti Sholc, ndërsa tha se Gjermania e mbështet rekomandimin e Komisionit Europian që Ukraina të marrë statusin e vendit kandidat për anëtarësim në BE dhe se do të angazhohet që Këshilli Europian të ketë një qëndrim të unifikuar për këtë çështje.

Në fund të kësaj jave (23-24 qershor), vendet anëtare të Bashkimit Europian do të diskutojnë dhe votojnë për rrugën europiane të Ukrainës.

Nëse Ukraina përparon drejt statusit të vendit kandidat, procesi për anëtarësimin e plotë në BE mund të zgjasë disa vite.

Ndërkohë, kancelari gjerman tha se vendi i tij do t’i vazhdojë sanksionet kundër Moskës, edhe pse ato dëmtojnë ekonominë gjermane.

“Ne po veprojmë kundër Rusisë me sanksione të ashpra dhe të papara. Sanksione që funksionojnë. Po, këto sanksione po na dëmtojnë edhe ne dhe kompanitë tona. Por janë të drejta”, tha zoti Sholc.

Kancelari gjerman ishte në Kiev së bashku me Presidentin francez Emanuel Makron dhe Kryeministrin italian Mario Draghi. Të tre udhëheqësit e lartë europianë u takuan edhe me Presidentin ukrainas Volodimir Zelenski dhe panë nga afër Irpinin, qytetin e shkatërruar nga sulmet e ashpra të Rusisë.

Më herët, Gjermania, Franca dhe Italia janë kritikuar nga Kievi se nuk kanë bërë sa duhet për ta ndihmuar Ukrainën në luftën kundër Rusisë, por vizita e përbashkët e udhëheqësve të këtyre tri vendeve është parë si shpresë për të ardhmen europiane të Ukrainës./ VOA

Lajmet e fundit nga