E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Rusia sulmon Kievin me breshëri dronësh e raketash mes fillimit të shkollave

2 Shtator 2024, 14:55, Kosova & Bota CNA

Rusia sulmon Kievin me breshëri dronësh e raketash mes fillimit

Rusia sulmoi gjatë natës Kievin me një breshëri dronësh dhe raketash me vetëdrejtim e balistike, njoftuan zyrtarët ukrainas të hënën.

Sulmet ndodhën ndërsa në gjithë Ukrainën fëmijët po përgatiteshin për t'u rikthyer në shkolla. Në disa prej tyre mësimi u anulua, për shkak të dëmtimeve në infrastrukturë.

Një seri shpërthimesh tronditën kryeqytetin ukrainas në orët e para të mëngjesit. Mbetjet e raketave dhe dronëve të interceptuar, plagosën tre persona si dhe dëmtuan dy kopshte, njoftuan zyrtarë të Ministrisë së Brendshme të Ukrainës. Autoritetet e qytetit raportuan për vatra të shumta zjarri pasojë e sulmeve.

Pas më shumë se 900 ditësh luftë, Rusia dhe Ukraina nuk po shfaqin asnjë shenjë tërheqjeje apo për t'u ulur për bisedime.

Palët po kryejnë ofensiva ambicioze tokësore. Ukrainasit po futen edhe më thellë në rajonin rus të Kurskut ndërsa ushtria ruse po përparon në rajonin e Donetskut në pjesën lindore të Ukrainës.

Presidenti rus Vladimir Putin tha të hënën se sulmi i Ukrainës në Kursk nuk do të pengojë forcat ruse të avancojnë në Ukrainën lindore. Ai tha se forcat ukrainase nuk e kanë arritur qëllimin e tyre për të larguar trupat ruse.

“Armiku nuk e ka përmbushur objektivin kryesor që i vendosi vetes, atë që të ndalë ofensivën tonë në Donbas", u tha zoti Putin nxënësve të një shkolle në Siberinë jugore.

Megjithatë, Presidenti i Ukrainës Volodymyr Zelenskyy tha muajin e kaluar se qëllimi i inkursionit në Kursk është krijimi i një zone neutrale që mund të parandalojë sulme të mëtejshme nga Moska përtej kufirit.

Zoti Putini tha se ofensiva e Ukrainës në Kursk, e cila nisi më 6 gusht, do të dështojë e për pasojë siç tha ai, zyrtarët në Kiev "do të duan të shkohet drejt bisedimeve të paqes".

Rusia lëshoi 35 raketa të llojeve të ndryshme dhe 26 dronë Shahed në Ukrainë gjatë natës nga e diela deri të hënën, njoftuan zyrtarë të forcave ajrore ukrainase. Forcat ukrainase bënë të ditur se kishin rrëzuar 9 raketa balistike, 13 me vetëdrejtim si dhe 20 dronë./ Voa