web counter
LEXO PA REKLAMA!

SHKARKO APP

App Store
Google Play

Rusia nuk dëshiron ta zgjasë armëpushimin e Pashkëve

21 Prill 2025, 07:36, Kosova & Bota CNA

Rusia nuk dëshiron ta zgjasë armëpushimin e Pashkëve

Rusia nuk dëshiron ta zgjasë përtej të dielës së Pashkëve armëpushimin në Ukrainë. Kremlini tha se nuk do ta përmbushë kërkesën e Ukrainës për një armëpushim 30-ditor. Presidenti Vladimir Putin nuk ka dhënë urdhër për zgjatjen e armëpushimit që shpalli për Pashkët, tha zëdhënësi i Kremlinit, Dmitry Peskov, për agjencinë shtetërore të lajmeve Tass.

Presidenti ukrainas Zelensky i propozoi sërish Rusisë që të pezullojë për të paktën 30 ditë sulmet me dronë dhe raketa ndaj infrastrukturës civile në Ukrainë. "Nëse Rusia nuk pajtohet me një hap të tillë, kjo dëshmon se ajo dëshiron vetëm të vazhdojë ato gjëra që shkatërrojnë jetë njerëzore dhe zgjasin luftën”, shkroi Zelensky në platformën X.

Akuza reciproke
Megjithë armëpushimin 30-orësh për Pashkët, që shpalli presidenti rus Putin, Ukrania dhe Rusia akuzuan njëra-tjetrën për sulme të vazhdueshme gjatë ditës së diel.

"Ne e dimë shumë mirë se si manipulon Moska dhe jemi të përgatitur për çdo gjë." - tha presidenti Zelenski. "Çdo goditjeje ruse do t'i përgjigjemi në mënyrë të përshtatshme" - tha Zelenksy, sipas të cilit fjalëve të Moskës nuk mund t'u besohet. Megjithatë presidenti ukrainas pranoi: "Në disa zona situata është qetësuar".

Nga ana tjetër Rusia i akuzoi forcat e armatosura ukrainase se kanë shkelur armëpushimin dhe kanë vazhduar sulmet, ndër të tjera në rajonin Donjetskut. Gjatë natës së të dielës kishte pasur dhjetëra sulme me dron nga pala ukrainase, tha Ministria ruse e Mbrojtjes. "Si rezultat ka të vdekur dhe të lënduar në radhët e popullatës civile dhe dëmtime të ndërtesave civile," thuhet në një deklaratë të ministrisë.

Informacioni i dhënë nga palët ndërluftuese nuk mund të verifikohet në mënyrë të pavarur./ DW





Lajmet e fundit nga