E fundit!

08:42 Politikë

Mblidhet sot Këshilli Kombëtar i PD-së/ Pritet zgjedhja e Sekretarit të Përgjithshëm, nënkryetarëve dhe strukturave

Partia Demokratike vijon procesin e riorganizimit të brend...

Putini kushtëzon eksportet e drithërave të Ukrainës me lehtësimin e sanksioneve

28 Maj 2022, 19:41, Kosova & Bota CNA

Putini kushtëzon eksportet e drithërave të Ukrainës me

Presidenti i Rusisë, Vladimir Putin

Presidenti i Rusisë, Vladimir Putin, duket se ka kushtëzuar rihapjen e mundshme të eksporteve të drithërave të Ukrainës me një lehtësim të sanksioneve, që Perëndimi vendosi ndaj Moskës pas nisjes së pushtimit të Ukrainës. Por, Presidenti i Francës dhe kancelari i Gjermanisë u kundërpërgjigjën se për lehtësim të sanksioneve duhet tërheqja e trupave të Rusisë dhe një përpjekje “serioze” për paqe nga Moska.

Në një bisedë telefonike më 28 maj, Putini i tha Presidentit francez, Emmanuel Macron, dhe kancelarit gjerman, Olaf Scholz, se “Rusia është e gatshme të ndihmojë në gjetjen e mundësive për të mos penguar eksportin e drithërave, përfshirë edhe eksportet e drithërave ukrainase nga portet e Detit të Zi”, njoftoi Kremlini.

Por, ai e ndërlidhi lehtësimin e bllokadës së Rusisë apo të porteve të Ukrainës me heqjen e sanksioneve të ashpra që Perëndimi i vendosi Moskës pas nisjes së pushtimit të Ukrainës më 24 shkurt.

Kryeministri britanik, Boris Johnson, ndërkaq, i tha Presidentit ukrainas, Volodymyr Zelensky, se shteti i tij dhe partnerët e G7-ës po punojnë për të ndihmuar Ukrainën që të rikthejë eksportet e drithërave.

Por, Kremlini tha se ka një ndërlidhje midis sanksioneve ndërkombëtare dhe heqjes së pengesave për eksportet dhe për këtë temë është biseduar në bisedën midis Putinit me Macron-in dhe Scholz-in.

“Një rritje e furnizimeve të fertilizuesve rusë dhe produkteve të agrikulturës po ashtu mund të ndihmojë në uljen e tensioneve në tregun botëror ushqimor, që sigurisht kërkon heqjen e sanksioneve të rëndësishme”, tha Kremlini.

Ukraina është një prej eksportueseve më të mëdha në botë të grurit, misrit dhe vajit të lulediellit, por forcat ruse aktualisht kanë bllokuar portet e saj në Detin e Zi, duke vënë në rrezik furnizimet botërore.

Putini po ashtu paralajmëroi Macron-in dhe Scholz-in kundër vazhdimit të furnizimit të Ukrainës me armë, duke thënë se kjo mund të destabilizojë edhe më tej situatën.

Berlini tha se në këtë bisedë 80-minutëshe, Scholz dhe Macron i bënë thirrje Putinit të angazhohet në “bisedime të drejtpërdrejta serioze” me presidentin ukrainas Zelensky", dhe "të gjejnë zgjidhje diplomatike për konfliktin”.

Scholz po ashtu tha se i kanë kërkuar Presidentit rus një armëpushim të menjëhershëm “dhe tërheqje të trupave ruse”.

Ndërkaq, në njoftimin e Presidencës franceze, u tha se Putinit iu kërkua që të lirojë mijëra luftëtarë ukrainas që janë zënë rob në fabrikën e çelikut Azovstal, në qytetin ukrainas të Mariupolit.

“Presidenti i Republikës dhe kancelari gjerman kërkuan lirimin e afër 2,500 mbrojtësve të fabrikës Azovstal, të cilët janë të burgosur të luftës nga forcat ruse”, tha Presidenca franceze./rel