E fundit!

12:06 Kronika

“Kërcet” arma në Kamëz/ Vritet një person

Mesditën e kësaj të hëne të shtëna me armë zjarri janë reg...

Pse Berlini refuzoi buxhetin bilionësh të Brukselit?

18 Korrik 2025, 08:59, Kosova & Bota CNA

Dy bilionë euro për shtatë vjet: Komisioni Europian ka plane të mëdha me një buxhet edhe më të madh. Por qeveria gjermane nuk është dakord, as ekonomia e shoqatat mjedisore.

Berlini zyrtar nuk e pranon buxhetin e BE-së e priten negociata të vështira në këshillimet midis shteteve anëtare dhe Parlamentit Europian në të ardhmen. Qeveria gjermane i ka kritikuar propozimet kryesore të Komisionit Europian për planet e ardhshme të buxhetit. Qeveria gjermane nuk e ka të mundur ta pranojë propozimin e Komisionit, sipas zëdhënësit të qeverisë, Stefan Kornelius.

"Një rritje e përgjithshme në buxhetin e BE-së është e panegociueshme në një kohë kur të gjitha shtetet anëtare po bëjnë përpjekje të konsiderueshme për të konsoliduar buxhetet e tyre kombëtare," tha Kornelius.

Gjermania kontribuon me pothuajse një të katërtën

Në të ashtuquajturin Kornizë Financiare Shumëvjeçare (KFSH), Komisioni Europian propozon një buxhet prej dy bilionë eurosh për periudhën 2028-2034. Kjo është e barabartë me rreth 700 miliardë euro më shumë sesa për periudhën aktuale buxhetore shtatëvjeçare. Ndër të tjera, janë planifikuar më shumë para për mbrojtjen dhe konkurrueshmërinë. Si shteti anëtar me peshën më të madhe ekonomike, Gjermania në përgjithësi kontribuon me pothuajse një të katërtën e fondeve.

KFSH është krijuar për një periudhë shtatëvjeçare dhe fillimisht propozohet nga Komisioni Europian përpara se të debatohet nga shtetet anëtare të BE dhe Parlamenti Europian. Buxheti afatgjatë përcakton kufijtë maksimalë për shpenzimet vjetore të BE-së dhe mënyrën se si përdoren ato.

Kritika ndaj taksimit shtesë të korporatave

Si një nga burimet e reja të të ardhurave për buxhetin e BE-së, Komisioni propozon një taksë mbi kompanitë e mëdha me një qarkullim vjetor prej më shumë se 100 milionë eurosh. Edhe kjo taksë shtesë mbi kompanitë e mëdha, e cila synon të lehtësojë buxhetet e shteteve anëtare, nuk e ka mbështetjen e qeverisë federale gjermane.

Ministri gjerman i Financave, Lars Klingbeil, deklaroi në kuadër të një takimi të ministrave të Financave të G-20-ës në Afrikën e Jugut se qeveria gjermane dëshiron të forcojë ekonominë gjermane, të garantojë punësimin dhe të tërheqë investime në vend. "Dhe në këtë kontekst, taksa e korporatave e propozuar tani nga Komisioni Europian, në formën aktuale, dërgon sinjal të gabuar."

Klingbeili kritikoi gjithashtu nivelin e planifikuar të shpenzimeve të Komisionit: "Ne duhet të ruajmë një proporcion absolut në aspektin e financave. Nuk mendoj se po përmbushet", tha politikani i SPD-së.

Megjithatë, qeveria gjermane mirëpret qasjen reformuese të Komisionit Europian, veçanërisht zhvendosjen në buxhet drejt prioriteteve të reja si konkurrueshmëria dhe aftësia mbrojtëse. Brukseli deklaroi në projektbuxhet, ndër të tjera, se do të zvogëlojë numrin e programeve të ndihmës në mënyrë që të shpërndajë më shumë fonde në mënyrë më të zhdërvjellët. Kritika nga biznesi, cenohet rritja ekonomike.

Shoqatat e biznesit janë veçanërisht të kujdesshme ndaj rregullave të mundshme tatimore për kompanitë: shoqata e industrisë automobilistike VDA kishte deklaruar më parë se kompanitë në Gjermani dhe Europë janë në një situatë jashtëzakonisht të vështirë ekonomike. "Prandaj, çdo rritje e taksave ose futja e taksave shtesë është e pabëshme, si në nivel kombëtar ashtu edhe në atë europian", deklaroi Presidentja e VDA Hildegard Müller. Një taksë e veçantë mbi fitimet duhet të konsiderohet veçanërisht e dëmshme për rritjen, pasi do të dobësonte konkurrueshmërinë e kompanive të BE-së.

Dhoma Gjermane e Industrisë dhe Tregtisë (DIHK) kishte deklaruar që para prezantimit të propozimit të Komisionit se një masë e tillë do të dërgonte "sinjal krejtësisht të gabuar". Sipas Drejtoreshës së Përgjithshme Helena Melnikov, kompanitë kanë nevojë për një nxitje, jo për taksa shtesë.

"Një zero për mbrojtjen e natyrës"

Grupet mjedisore besojnë se interesat e tyre nuk merren mjaftueshëm parasysh në projektbuxhet: Federata Gjermane për Mjedisin dhe Mbrojtjen e Natyrës (BUND) e quan propozimin e Komisionit "një zero për mbrojtjen e natyrës". Sipas presidentit të saj, Olaf Bandt, mungojnë angazhime konkrete financimi, për shembull, për zbatimin e Aktit të BE-së për Rivendosjen e Natyrës për restaurimin e natyrës. WWF kritikoi shkurtimet e propozuara për mbrojtjen e mjedisit dhe natyrës pavarësisht krizave në përkeqësim, "dhe kjo në një verë tjetër me valë të nxehti, zjarre pyjore dhe përmbytje"./ DW