Protestat e popullit të Iranit/ Presidentja e PE merr vendimin drastik për diplomatët iranianë

12 Janar 2026, 17:37, Kosova & Bota CNA

Protestat e popullit të Iranit/ Presidentja e PE merr vendimin drastik

Presidentja e PE, Roberta Metsola ka ndaluar çdo përfaqësues të Republikës Islamike të Iranit të hyjë në ambientet e Parlamentit Europian.

Në një postim në “X”, Metsola shprehet se ndërsa populli i Iranit po proteston për të drejtat dhe lirinë e tij, puna nuk mund të vazhdojë si zakonisht.

Ajo thekson se PE nuk do të ndihmojë në legjitimimin e regjimit që sipas saj është mbështetur nëpërmjet torturës, shtypjes dhe vrasjeve.

Postimi i plotë:

Nuk mund të vazhdojë puna si zakonisht. Ndërsa populli i guximshëm i Iranit vazhdon të ngrihet për të drejtat dhe lirinë e tij, sot kam marrë vendimin për të ndaluar të gjithë stafin diplomatik dhe çdo përfaqësues tjetër të Republikës Islamike të Iranit nga të gjitha ambientet e Parlamentit Evropian. Kjo Dhomë nuk do të ndihmojë në legjitimimin e këtij regjimi që është mbështetur nëpërmjet torturës, shtypjes dhe vrasjeve.

It cannot be business as usual.

As the brave people of Iran continue to stand up for their rights and their liberty, today I have taken the decision to ban all diplomatic staff and any other representatives of the Islamic Republic of Iran from all European Parliament premises.…
— Roberta Metsola (@EP_President) January 12, 2026

Agjencia e Lajmeve të Aktivistëve të të Drejtave të Njeriut (HRANA) me seli në SHBA ka deklaruar se ka verifikuar vdekjen e 495 protestuesve dhe 48 personelit të sigurisë në të gjithë vendin. Agjencia thotë se 10,600 persona të tjerë janë arrestuar gjatë dy javëve të trazirave.

Protestat që filluan për shkak të inflacionit në rritje tani po bëjnë thirrje për t'i dhënë fund sundimit klerikal të Udhëheqësit Suprem të Iranit, Ayatollah Ali Khamenei. Pakënaqësitë nisën për shkak të krizës ekonomike, zhvlerësimit të valutës kombëtare dhe krizës së energjisë dhe protestat janë përhapur në shumë qytete iraniane.

Presidenti amerikan, Donald Trump, ka shprehur mbështetje për protestuesit iranianë dhe ka rritur presionin ndaj regjimit autoritar në Teheran, që ka qeverisur me vendin që nga Revolucioni Islamik i vitit 1979. /CNA