E fundit!

22:29 Aktualitet

Protestuesit largohen nga Kryeministria/ Nisin marshimin në rrugët e kryeqytetit

Protestuesit janë larguar nga sheshi para Kryeministrisë, ...

Përmbytjet në Azinë Jugore/ 600 persona humbin jetën

29 Nëntor 2025, 19:40, Kosova & Bota CNA

Shirat e rrëmbyeshëm kanë shkaktuar përmbytje dhe rrëshqitje toke në pjesë të Azisë Jugore, duke u marrë jetën rreth 600 personave.

Shirat musonikë, të përkeqësuar nga stuhitë tropikale, shkaktuan disa nga përmbytjet më të këqija të rajonit në vite, me miliona të prekur në Indonezi, Malajzi, Tajlandë dhe Sri Lanka.

Reshje të dendura shiu filluan në ishullin indonezian të Sumatrës të mërkurën.

“Gjatë përmbytjes, gjithçka u zhduk. Doja të shpëtoja rrobat e mia, por shtëpia ime u shemb”, tha një banor i Bireuen në provincën Aceh të Sumatrës për agjencinë e lajmeve Reuters.

Me qindra të tjerë që ende rezultojnë të zhdukur, numri i të vdekurve ka të ngjarë të rritet. Mijëra njerëz mbeten të bllokuar, disa prej të cilëve presin shpëtim në çatitë e shtëpive. Deri të shtunën, më shumë se 300 persona kishin vdekur në Indonezi dhe 160 në Tajlandë. Pati gjithashtu disa vdekje të raportuara në Malajzi.

Në Sri Lanka, e cila është goditur nga një ciklon, më shumë se 130 persona kanë vdekur dhe rreth 170 të tjerë janë të zhdukur, thanë zyrtarët.

Cikloni tropikal jashtëzakonisht i rrallë, i quajtur Cikloni Senyar, shkaktoi rrëshqitje katastrofike të dheut dhe përmbytje në Sri Lanka dhe Indonezi, me shtëpi të rrëmbyera dhe mijëra ndërtesa të zhytura.

Agjencia e fatkeqësive natyrore e Indonezisë tha të shtunën se gati 300 persona rezultojnë ende të zhdukur pas përmbytjeve që shkatërruan Sumatrën.

“Rryma ishte shumë e shpejtë, brenda pak sekondash arriti në rrugë, hyri në shtëpi”, tha për BBC-në, Arini Amalia, një banore në Provincën Aceh./ CNA, përkthyer nga BBC

Ajo dhe gjyshja e saj vrapuan drejt shtëpisë së një të afërmi në një terren më të lartë. Kur u kthye të nesërmen për të marrë disa sende, ajo tha se përmbytja e kishte përpirë plotësisht shtëpinë.

Pasi ujërat u ngritën me shpejtësi në Sumatrën Perëndimore dhe përmbytën shtëpinë e tij, Meri Osman tha se "u rrëmbye nga rryma" dhe u kap pas një litari rrobash derisa u shpëtua.

Moti i keq ka penguar operacionet e shpëtimit dhe, ndërsa dhjetëra mijëra njerëz janë evakuuar, qindra të tjerë janë ende të bllokuar, tha agjencia indoneziane e fatkeqësive.