"Ndikon negativisht tek të vegjëlit"/ Suedia u bën thirrje prindërve të largojnë telefonat kur janë me fëmijët

1 Qershor 2026, 21:55, Kosova & Bota CNA

"Ndikon negativisht tek të vegjëlit"/ Suedia u bën

Autoriteti i Shëndetit Publik në Suedi u ka bërë thirrje prindërve të kufizojnë përdorimin e telefonave celularë gjatë kohës që kalojnë me fëmijët, pasi studimet kanë treguar se përdorimi i tepërt i ekraneve nga të rriturit ndikon negativisht tek të vegjëlit.

Në udhëzimet e reja të publikuara të hënën, autoritetet rekomandojnë që prindërit ta lënë telefonin mënjanë kur janë me fëmijët dhe ta përdorin vetëm kur është e nevojshme ose kur e përdorin së bashku me ta.

“Mbajeni telefonin larg kur jeni me fëmijën tuaj. Përdoreni vetëm nëse është e nevojshme ose kur e përdorni bashkë me të”, thuhet në deklaratën e autoritetit.

Sipas ekspertëve, zakonet digjitale të prindërve ndikojnë drejtpërdrejt në sjelljen e fëmijëve. Studimi i kryer nga agjencia suedeze tregoi se përdorimi i shpeshtë i telefonit nga prindërit mund të dëmtojë ndërveprimin me fëmijët dhe se fëmijët e prindërve që kalojnë shumë kohë para ekraneve kanë tendencë të zhvillojnë të njëjtat zakone.

Autoritetet rekomandojnë gjithashtu krijimin e zonave pa ekrane në shtëpi, si dhoma e gjumit ose tavolina e ngrënies, si dhe u bëjnë thirrje prindërve të tregohen të kujdesshëm me publikimin e fotove dhe videove të fëmijëve në internet. Ministri suedez për Çështjet Sociale, Jakob Forssmed, deklaroi se shumë njerëz nuk e kuptojnë se sa i madh është ndikimi i përdorimit të telefonit nga prindërit tek fëmijët.

Ndërkohë, Suedia ka vendosur prej kohësh kufizime për kohën që fëmijët duhet të kalojnë para ekraneve. Udhëzimet sugjerojnë që fëmijët nën moshën dy vjeç të mos përdorin fare ekrane për qëllime jo-shkollore, ndërsa për grupmoshat 2-5 vjeç rekomandohet maksimumi një orë në ditë. Për fëmijët 6-12 vjeç kufiri është dy orë, ndërsa për adoleshentët 13-18 vjeç deri në tre orë në ditë.

Po ashtu, autoritetet këshillojnë që pajisjet digjitale të mos përdoren në orët para gjumit dhe që telefonat, tabletët dhe kompjuterët të mbahen jashtë dhomës së gjumit gjatë natës. Nga viti shkollor 2026-2027, Suedia do të zbatojë edhe një ndalim kombëtar të telefonave inteligjentë në shkolla për nxënësit deri në klasën e nëntë, përkatësisht deri në moshën 15-16 vjeç. /CNA