E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Kurti publikoi videon e ushtarëve serbë në kufi me Kosovën, reagon Beogradi

22 Mars 2024, 12:56, Kosova & Bota CNA

Kurti publikoi videon e ushtarëve serbë në kufi me Kosovën,

Kryeministri i Kosovës, Albin Kurti, publikoi një video në rrjetet sociale, ku njësi të specializuara të ushtrisë së Serbisë janë shfaqur vetëm disa metra larg kufirit me Kosovën, në afërsi të fshatit Banje të Zubin Potokut.

Kurti nënvizon se lëvizje të ngjashme janë regjistruar edhe në fshatin Oslare të Bujanovcit, në afërsi të kufirit me Kosovën. Ai thekson se synimi i ushtrisë serbe është të shkaktojë provokime në kufi.

Për këtë deklaratë të Kurtit ka ardhur edhe një reagim nga Sekretari Shtetëror në Ministrinë e Mbrojtjes të Serbisë, Nemanja Staroviq, i cili ka thënë se kryeministri i Kosovës “po imagjinon një invazion”.

Ai ka sqaruar se forcat e armatosura serbe nuk kanë hyrë kurrë në territorin e Kosovës pas vitit 1999 dhe nuk do ta bëjnë kurrë këtë gjë.

“Alarmizimi i pabazë i shërben shumë mirë qëllimit të Kurtit, pasi shpërqendron vëmendjen nga vuajtjet e popullit serb nën grushtin e tij të hekurt dhe e përshkruan Kosovën si viktimë të ndonjë ‘pushtimi’ të imagjinuar që nuk ka ndodhur dhe nuk do të ndodhë kurrë. Për të përsëritur edhe një herë, me zë të lartë dhe qartë, forcat e armatosura serbe nuk kanë hyrë kurrë në territorin e Kosovës pas vitit 1999 dhe nuk do të hyjnë kurrë, derisa të lejohen nga KFOR-i, siç parashikohet në rezolutën 1244 të KS të OKB-së. Pyetja e duhur për të bërë do të ishte se çfarë po bëjnë njësitet e militarizuara monoetnike shqiptare të policisë së Kosovës në veri të Kosovës, pasi vendosja e tyre e përhershme në zonë shkel Rezolutën 1244 të KS të OKB-së, Marrëveshjen e Brukselit dhe shumë marrëveshje të tjera”, shprehet zyrtari i lartë serb.

Ai ndër të tjera akuzoi kryeministrin Kurti për “okupim në stil ushtarak” të veriut të Kosovës, dhe për ndalim të serbëve që të marrin pjesë në zgjedhjet lokale në katër komunat në veri vitin e kaluar, ndonëse ky ishte vendim i vetë serbëve lokalë./CNA