Izraeli dëbon Thunberg pas konfiskimit të anijes me të cilën ajo po shkonte drejt Gazës

10 Qershor 2025, 11:56, Kosova & Bota CNA

Izraeli dëbon Thunberg pas konfiskimit të anijes me të cilën

Aktivistja Greta Thunberg është dëbuar nga Izraeli të martën, një ditë pasi ushtria izraelite e konfiskoi anijen me të cilën ajo dhe disa aktivistë të tjerë po udhëtonin për në Rripin e Gazës, njoftoi Ministria e Jashtme e Izraelit.

Thunberg u nis me avion drejt Francës, nga ku më pas do të kthehet në vendin e saj, Suedi, tha Ministria e Jashtme e Izraelit në "X".

Thunberg ishte në mesin e 12 udhëtarëve në anijen Madleen, e cila po dërgonte ndihma për Gazën, në shenjë proteste kundër luftës së vazhdueshme të Izraelit dhe me qëllim për ta tërhequr vëmendjen mbi krizën humanitare në territorin palestinez, sipas Koalicionit të Flotës së Lirisë, i cili e organizoi udhëtimin.

Forcat detare izraelite e konfiskuan anijen pa ndonjë incident mëngjesin e së hënës, rreth 200 kilometra larg bregut të Gazës, sipas koalicionit, i cili bashkë me grupe për të drejtat e njeriut, thanë se Izraeli e shkeli ligjin ndërkombëtar me këtë veprim.

Izraeli i mohon akuzat, duke thënë se anijet e tilla synojnë ta thyejnë një bllokadë detare ndaj Gazës, të cilën ai e cilëson si të ligjshme.

Anija, e shoqëruar nga marina izraelite, mbërriti në portin izraelit të Ashdodit të hënën në mbrëmje, sipas Ministrisë së Jashtme izraelite.

Adalah, një organizatë për të drejtat ligjore në Izrael që përfaqëson aktivistët, tha se Thunberg, dy aktivistë të tjerë dhe një gazetar ishin pajtuar të dëboheshin dhe të largoheshin nga Izraeli.

Tetë aktivistët nuk pranuan të dëboheshin, dhe po mbahen në paraburgim, prandaj rastet e tyre do të shqyrtohen nga autoritetet izraelite, sipas Adalah.

Grupi shtoi se aktivistët pritet të dalin para gjykatës më vonë të martën.

Sabine Haddad, zëdhënëse në Ministrinë e Brendshme të Izraelit, tha se aktivistët që po dëboheshin të martën kishin hequr dorë nga e drejta për të dalë para gjykatësit. Ata që nuk pranuan, do të dalin para gjykatës dhe do të mbahen në paraburgim për 96 orë, para se të dëbohen.

Rima Hassan, anëtare franceze e Parlamentit Europian me prejardhje palestineze, ishte gjithashtu mes vullnetarëve në bord. Asaj i ishte ndaluar hyrja në Izrael për shkak të qëndrimeve të saj kundër politikave izraelite ndaj palestinezëve. Nuk është e qartë nëse ajo do të dëbohet menjëherë apo është ndaluar.

Të hënën, Adalah tha se Izraeli “nuk kishte asnjë autoritet ligjor” për të marrë kontrollin e anijes, pasi ajo ndodhej në ujëra ndërkombëtare dhe nuk ishte nisur drejt Izraelit, por drejt “ujërave territoriale të shtetit të Palestinës”.

"Amnesty International" deklaroi se Izraeli po shkelte ligjin ndërkombëtar me ndërhyrjen detare dhe bëri thirrje për lirimin e menjëhershëm dhe pa kushte të aktivistëve.

Izraeli e vlerësoi anijen si shfaqje, duke e quajtur atë “jahti i selfie-ve”.

Zyrtarët izraelitë thanë se anija po sillte ndihma të “pakëta”, me sasi më të vogël se një ngarkesë kamioni./ REL