Sulmi në Banjskë/ Sveçla: Kemi mjaftueshëm dëshmi, Prokuroria të publikojë rezultatet

6 Janar 2024, 08:52, Kosova & Bota CNA

Sulmi në Banjskë/ Sveçla: Kemi mjaftueshëm dëshmi,

Foto nga momenti i sulmit në Banjskë

Ministri i Punëve të Brendshme, Xhelal Sveçla, ka kërkuar nga Prokuroria e Shtetit të Kosovës që të publikojë rezultatet e hetimeve lidhur me sulmin terrorist të 24 shtatorit në Banjskë.

Sveçlës gjatë një interviste televizive është shprehur se ka mjaftueshëm dëshmi që hetimi të përmbyllet në këtë fazë.

“Policia e Kosovës ka ndërmarrë hetimet më të mëdha në historikun e saj, në rastin e Banjskës, në sulmin terrorist në fshatin Bansjkë. Kjo ka zgjatë, por unë besoj se kemi mjaftueshëm dëshmi që hetimi të përmbyllet në këtë fazë. Pres që Prokuroria bashkë me Policinë e Kosovës të dalin me rezultatet e këtyre hetimeve”, ka deklaruar Sveçla për RTV Dukagjini.

Po ashtu kryeministrit I Kosovës Albin Kurti ka kërkuar publikimin e rezultateve të arritura pas hetimit.

“Nuk ka informacion të Qeverisë së Kosovës, të institucioneve lidhur me sulmin terrorist në Banjskë, që nuk i është dhënë Prokurorisë së Shtetit. Sot janë bërë 3 muaj prej se është kumtuar urdhri për sulmin terrorist që e vrau heroin Afrim Bunjaku. 3 muaj kur është kumtuar urdhri dhe ky informacion ndodhet tashmë edhe te prokuroria. Ka pa numër fakte dhe dëshmi materiale që janë më së të mjaftueshme për të ngritur aktakuzat për sulmin në Banjskë. Në përgjithësi, viti i kaluar ishte vit i barrikadave dhe llogoreve paraushtarake. Ky vit ishte vit i sulmeve terroriste dhe paraushtarake”, pati deklaruar Kurti në dhjetor. Po ka shpërputhje shumë të madhe mes informacionit, fakteve, dëshmive e argumenteve në njërën anë dhe aktakuzave e proceseve gjyqësore në anën tjetër. Për pasojë edhe të njerëzve që janë prapa grilave. Është numër mino. Dhe ky hendek s’mund të mbushet nga Qeveria e Kosovës, i takon Prokurorisë së Shtetit. Andaj edhe pyetja duhet të jetë Prokurorinë e Shtetit. Unë jam këtu për të ndihmuar, por ata janë aty për të punuar. S’mund ta ndihmoj dikë që s’punon. Mund ta ndihmoj dikë vetëm që punon”, është shprehur Kurti.

Kritikave të Kurtit u ishte kundërpërgjigjur Kryeprokurori i Prokurorisë Speciale të Kosovës, Blerim Isufaj, duke thënë se nuk është çështje e kryeministrit se kur ngritën aktakuzat e kur pushojnë hetimet.

Sulmi në banjskë ndodhi më 24 shtator në fshatin Banjskë të Zveçanit. Gjatë sulmit, i vrarë mbet i polici, Afrim Bunjaku, dhe tre prej agresorëve./ CNA