E fundit!

12:34 Aktualitet

Dita e Ashures/ Mesazhi i Baba Mondit: Lutjet tona shkojnë për ata që vuajnë nga luftërat

Besimtarët bektashinj ka kremtuar sot Ditën e Ashures, një...

Hamasi publikon videon e një pengu izraelito-amerikan

30 Nëntor 2024, 22:00, Kosova & Bota CNA

Grupi militant palestinez Hamas ka publikuar të shtunën videon e një pengu izraelito-amerikan, ku ai i bën thirrje Presidentit të zgjedhur Donald Trump që të arrijë lirimin e tij nga robëria.

Familjarët e ushtarakut 20-vjeçar Edan Alexander nuk pranuan të komentojnë, por ranë dakord për publikimin e videos që zgjat tre minuta e gjysëm. Zoti Alexander u mor peng në Gazë gjatë sulmit të 7 tetorit 2023 nga Hamasi në Izraelin jugor.

Në video, ai shfaqet i zbehtë, i ulur në një hapësirë të errët me një mur pas tij. Pasi identifikon veten, ai i drejtohet familjes së tij, Kryeministrit izraelit Benjamin Netanyahu dhe Presidentit të zgjedhur Trump. Nuk është e qartë nëse komentet e tij ishin të parapërgatitura nga pengmarrësit.

Kryeministri Netanyahu u shpreh në një deklaratë se videoja ishte një mjet mizor i luftës psikologjike dhe se i ka thënë familjes së zotit Alexander nëpërmjet telefonit se Izraeli po punon pa u ndalur për të rikthyer pengjet në atdhe.

Rreth gjysma e 101 personave që ende mbahen peng në Gazë dhe prej të cilëve nuk ka patur ndonjë komunikim, mendohet se vazhdojnë të jenë të gjallë.

Udhëheqësit e Hamasit pritej të qëndronin në Kajro të shtunën për bisedime armëpushimi me zyrtarët egjiptianë, për të eksploruar mënyrat për të arritur një marrëveshje që do të arrinte lirimin e pengjeve, në këmbim të lirimit të të burgosurve palestinezë.

Kontaktet rifilluan pasi Uashingtoni tha këtë javë se po ripërtërinte përpjekjet drejt arritjes së këtij objektivi.

Forumi i Familjeve të Pengjeve i bëri thirrje administratës së Presidentit në largim Joe Biden dhe të Presidentit të zgjedhur Donald Trump, i cili e merr detyrën në janar, të shtojnë përpjekjet për të arritur një marrëveshje për lirimin e pengjeve.

“Jetët e pengjeve varen nga një fije peri”, u shprehën anëtarët e familjeve të pengjeve.

Sipas zyrtarëve në Gazë, fushata e Izraelit ka vrarë të paktën 44,200 persona dhe ka zhvendosur gati të gjithë popullsinë të paktën një herë.

Lufta u shkaktua nga militantët e Hamasit, të cilët sulmuan komunitetet në jug të Izraelit 13 muaj më parë. Sipas autoriteteve izraelite, ata vranë 1,200 persona dhe morën peng mbi 250 të tjerë./ VOA