E fundit!

12:39 Aktualitet

“Vrasja e efektivit duhet të hetohet”/ Berisha akuza Hitës: Në vend të dorëheqjes kërkon të mbrojë karrigen e tij

Kreu i PD-së Sali Berisha ka kërkuar hetim të thelluar në ...

Gjenerata Z proteston dhunshëm kundër Presidentes Boluarte në Peru

29 Shtator 2025, 12:40, Kosova & Bota CNA

Gjenerata Z proteston dhunshëm kundër Presidentes Boluarte në

Autoritetet dhe avokatët kanë bërë me dije se 19 persona, përfshirë një oficer policie, janë plagosur gjatë protestave kundër qeverisë së Presidentes peruane Dina Boluarte.

Gjatë fundjavës, qindra njerëz marshuan drejt selisë së qeverisë në Limën qendrore.

Në protestë pati një numër të madh të forcave policore, ndaj të cilëve një grup të rinjsh hodhën gurë, bomba molotovi dhe fishekzjarre. Forcat e rendit u përgjigjën me gaz lotsjellës dhe plumba gome.

Koordinatori Kombëtar i të Drejtave të Njeriut (CNDDHH), një koalicion i të drejtave të njeriut, raportoi të dielën se 19 persona u plagosën në përleshje, përfshirë një gazetar.

"Një oficer policie pësoi djegie të shkallës së parë nga një koktej molotov gjatë marshimit të organizuar nga grupe të ndryshme", raportoi Policia Kombëtare, teksa pamjet nga protesta e dhunshme publikoheshin në rrjetet sociale.

CNDDHH i drejtoi gishtin e akuzës policisë për dhunën.

"Ne i bëjmë thirrje policisë të respektojë të drejtën për të protestuar. Nuk kishte asnjë justifikim për të hedhur sasi të mëdha gazi lotsjellës, e lëre më për të sulmuar njerëzit", tha Mar Perez, një avokat i CNDDHH.

Protesta, që kishte si kryefjalë luftën kundër korrupsionit dhe zhvatjes, u shpërnda nga dhjetëra oficerë policie duke përdorur gaz lotsjellës të dielën në mbrëmje.

"Ne po marshojmë kundër korrupsionit, për jetën dhe kundër krimit që po na vret çdo ditë", tha Adriana Flores, inxhiniere për agjencinë e lajmeve AFP të dielën.

Trazirat sociale janë rritur që kur qeveria Boluarte miratoi një ligj më 5 shtator që u kërkon të rinjve të kontribuojnë në fondet private të pensioneve, pavarësisht pasigurisë në punë dhe një shkalle punësimi jozyrtare prej mbi 70 %.

Pëlqimi i qytetarëve për Boluarte ka rënë ndjeshëm në pjesën e fundit të mandatit të saj, që përfundon më 28 korrik 2026.

Sipas disa sondazheve të opinionit publik, kongresi me shumicë konservatore po përballet me një situatë të ngjashme për shkak të perceptimeve të korrupsionit.

Protestat janë përshkallëzuar në Peru gjatë gjashtë muajve të fundit, pas një vale zhvatjesh dhe vrasjesh nga grupet e krimit të organizuar./ CNA