E fundit!

16:34 Aktualitet

Dosja "Toyota Yaris"/ GJKKO dërgon për gjykim me themel ish-oficeren e BKH

Gjykata e Posaçme ka dërguar në gjyq dy të pandehurit në d...

Formimi i qeverisë së re në Kosovë/ Osmani mandaton Kurtin

11 Tetor 2025, 12:19, Kosova & Bota CNA

Presidentja e Kosovës, Vjosa Osmani, ka mandatuar kryeministrin në detyrë, Albin Kurtin për formimin e qeverisë së re.

Përmes një postimi në rrjetet sociale, Presidenca bën me dije se Osmani ka nënshkruar sot dekretin që mandaton Kurtin për formimin e qeverisë së Kosovës.

Në njoftim thuhet se sipas Kushtetutës së Kosovës, Kurti është i detyruar t'i paraqesë Kuvendit përbërjen dhe programin e qeverisë për miratim, brenda 15 ditëve nga nënshkrimi i dekretit të presidentes.

Postimi i presidencës:

Presidentja Osmani mandaton z. Albin Kurti për formimin e Qeverisë së Republikës së Kosovës

Presidentja e Republikës së Kosovës, Vjosa Osmani, në mbështetje të kompetencave të saj kushtetuese, ka nënshkruar sot Dekretin, me të cilin mandaton z. Albin Kurti për formimin e Qeverisë së Republikës së Kosovës.

Ky vendim është marrë pas propozimit zyrtar të partisë Lëvizja Vetëvendosje, e cila ka fituar numrin më të madh të ulëseve në Kuvend nga rezultatet e zgjedhjeve të mbajtura me 9 shkurt të këtij viti.

Sipas Kushtetutës, mandatari për formimin e Qeverisë, z. Kurti, është i obliguar që jo më vonë se pesëmbëdhjetë (15) ditë nga dita e dekretimit, t’i paraqesë Kuvendit të Republikës së Kosovës përbërjen dhe programin e Qeverisë për miratim.

Presidentja i ka uruar suksese z.Kurti, kryeministër në detyrë, me shpresën që Republika e Kosovës sa më parë të ketë Qeveri me mandat të plotë kushtetues.

Një ditë më parë, kryetari i Kuvendit, Dimal Basha, e shpalli Kuvendin e Kosovës të konstituuar pasi Nenad Rashiç u zgjodh nënkryetar i Kuvendit nga pakica serbe.

Nenad Rashiç, nga partia Për Liri, Drejtësi dhe Mbijetesë, u zgjodh nënkryetar i Kuvendit të Kosovës, pas dështimit të nëntë propozimeve të Listës Serbe dhe kalimit në zgjedhjen e nënkryetarit përmes procedurës së shortit. Me 71 vota për, 9 kundër dhe 24 abstenime, ai u bë njëri nga pesë nënkryetarët e Kuvendit të Kosovës.

Përveç votave nga deputetët e Lëvizjes Vetëvendosje dhe disa prej deputetetëve të komuniteteve joshumicë joserbe, ai siguroi edhe votat e deputetëve të Lidhjes Demokratike të Kosovës. Deputetët e Partisë Demokratike të Kosovës dhe ata të Aleancës për Ardhmërinë e Kosovës abstenuan, ndërsa Lista Serbe votoi kundër./CNA