web counter
LEXO PA REKLAMA!

SHKARKO APP

App Store
Google Play

Dështon për herë të 16-të konstituimi i Kuvendit të Kosovës

15 Maj 2025, 12:05, Kosova & Bota CNA

Dështon për herë të 16-të konstituimi i Kuvendit

Kuvendi i Kosovës nuk ka arritur të konstituohet as në seancën e sotme për të 16-ën herë me radhë. Kjo situatë në politikën e Kosovës vijon që pas zgjedhjeve të 9 shkurtit.

Edhe këtë herë, seanca nisi me votimin për krijimin e një Komisioni "ad-hoc" për votim të fshehtë të pozitës së kryeparlamentarit, por shumica e partive e kundërshtuan këtë komision duke mos propozuar anëtarin e tyre për këtë komision.

Nga 111 deputetë të pranishëm në sallë vetëm 55 vota ishin pro formimit të këtij komisioni për votimin e fshehtë të kryeparlamentarit, një kundër dhe zero abstenime.

Siç raportohet nga mediat në Kosovë, pas seancës, kreu i partisë së dytë më të madhe, Partisë Demokratike të Kosovës (PDK), Memli Krasniqi, tha se veprimet e tilla nga Lëvizja Vetëvendosje janë pengmarrje e institucioneve.

"Fiks një muaj më parë jemi mbledhur këtu për herë të parë, të gatshëm për konstituim, dhe jemi një muaj më vonë e shumë muaj pas zgjedhjeve dhe jemi në bllokadën që po vazhdon ta mbajë partia e parë",-tha Krasniqi.

Nga 61 vota sa nevojiten minimalisht, kandidatja e Lëvizjes Vetëvendosje, Albulena Haxhiu, deri më tani ka marrë jo më shumë se 57 vota për kryetare të Kuvendit të Kosovës, të cilat 48 janë nga Lëvizja Vetëvendosje dhe 9 nga deputetët që vijnë nga komunitetet. Për herë të parë seanca konstituive u mbajt më 15 prill./CNA

 





Lajmet e fundit nga