web counter
LEXO PA REKLAMA!

SHKARKO APP

App Store
Google Play

E fundit!

x

Ceremonia e inaugurimit të Presidencës polake të BE-së/ Orban nuk ftohet

3 Janar 2025, 11:08, Kosova & Bota CNA
Ceremonia e inaugurimit të Presidencës polake të BE-së/
Kryeministri i Hungarisë, Viktor Orban

Polonia ka vendosur që të mos e ftojë ambasadorin e Hungarisë në ngjarjen që do të mbahet më 3 janar për nisjen e Presidencës polake të Bashkimit Europian. Kjo pasi Budapesti i dha azil politik një ish-zëvendësministri, i cili po hetohet për dyshimet për keqpërdorim të fondeve publike, tha një zyrtare e lartë.

Kryeministri hungarez, Viktor Orban, po ashtu nuk është ftuar në ceremoninë që do të mbahet në Varshavë, tha zëvendësministrja për Çështje Europiane, Magdalena Sobkowiak-Czarnecka.

Varshava ka shprehur zemërim pasi Hungaria muajin e kaluar i dha azil politik Marcin Romanowskit, ish-zëvendësministrit polak të Drejtësisë, i cili u ndalua korrikun e vitit të kaluar si pjesë e një hetimi për keqpërdorim të fondeve publike.

Romanowski u lirua shpejt pasi presidenti i Asamblesë europiane për të drejtat e njeriut tha se ai kishte imunitet pasi ishte anëtar i këtij trupi. Ish-zëvendësministri i mohon akuzat kundër tij.

“Kur ne i ftuam mysafirët në galanë tonë para një muaji, ne e ftuam gjithë korpusin diplomatik”, tha Sobkowiak-Czarnecka gjatë një deklarimi televiziv të premten.

“Por, pas situatës me zëvendësministrin Romanowski, ministri [i Punëve të Jashtme, Radek] Sikorski vendosi që ambasadori hungarez nuk do të jetë i mirëpritur në ngjarjen e sotme”.

Kryeministri polak, Donald Tusk, dhe presidenti i Këshillit Europian, Antonio Costa, pritet të mbajnë fjalime në ceremoninë e inaugurimit të Presidencës gjashtëmujore të Polonisë në BE.

Hungaria e ka pasur kryesimin e BE-së në gjysmën e dytë të vitit 2024.

Tusk ka qenë një kritik i Orban-it për qëndrimin e tij lidhur me luftën në Ukrainë, por edhe për politikat që Polonia i konsideron proruse. Orban i ka thënë një medieje hungareze se qeveria e Tusk-ut i konsideron hungarezët armiq./REL





Lajmet e fundit nga