E fundit!

22:15 Aktualitet

Aksident me një viktimë në autostradën Vlorë-Fier

Një aksident rrugor me një viktimë ka ndodhur mbrëmjen e s...

Benjamin Netanyahu i kërkon falje zyrtare presidentit të Izraelit

30 Nëntor 2025, 14:12, Kosova & Bota CNA

Kryeministri izraelit Benjamin Netanyahu i ka kërkuar falje zyrtare presidentit izraelit, duke argumentuar se procesi i gjatë gjyqësor ndaj tij po pengon aftësinë e për të qeverisur dhe se një falje do të ishte në të mirën e vendit.

Netanyahu, kryeministri me shërbimin më të gjatë në historinë e vendit, i ka mohuar prej kohësh akuzat për ryshfet, mashtrim dhe shkelje të besimit. Avokatët e tij thanë në një letër drejtuar zyrës së presidentit se kryeministri beson se procedurat ligjore do të rezultojnë në lirimin e tij të plotë nga akuzat.

"Avokatët e mi i dërguan sot një kërkesë për falje presidentit të vendit. Pres që të gjithë ata që ia duan të mirën vendit do ta mbështesin këtë hap", tha Netanyahu në një deklaratë të shkurtër video të lëshuar nga partia e tij Likud.

Zyra e Presidentit Isaac Herzog njoftoi më herët sot se kërkesa ishte pranuar. Gjithashtu zyra e Herzog bëri me dije se kjo kërkesë do t'i përcillet Ministrisë së Drejtësisë, siç është praktikë standarde, për të mbledhur mendime, të cilat do t'i paraqiten këshilltarit ligjor të presidentit, i cili do t'i bëjë një rekomandim presidentit. Ministri i Drejtësisë i Izraelit, Yariv Levin, është anëtar i partisë Likud të Netanyahut dhe një aleat i ngushtë i kryeministrit.

Në letër, avokatët e Netanyahut argumentojnë se procedurat penale kundër tij kanë thelluar përçarjet sociale dhe se përfundimi i gjyqit është i nevojshëm për pajtimin kombëtar. Ata gjithashtu thonë se seancat gjyqësore gjithnjë e më të shpeshta janë lodhëse, ndërsa kryeministri po përpiqet të kryejë detyrat e tij si zyrtar qeveritar.

Faljet tradicionalisht jepen në Izrael vetëm pasi të kenë përfunduar procedurat ligjore dhe i pandehuri të jetë dënuar. Avokatët e Netanyahut kanë argumentuar se presidenti mund të ndërhyjë kur interesi publik është në rrezik, si në këtë rast, me qëllim zhdukjen e përçarjeve dhe forcimin e unitetit kombëtar. Lideri i opozitës, Yair Lapid, tha në një deklaratë se Netanyahu nuk duhet të falet pa pranimin e fajit, një shprehje pendese dhe një largim të menjëhershëm nga politika. /CNA