Arabia Saudite paralajmëron "Netflix"-in për shkeljen e 'vlerave islame'

7 Shtator 2022, 09:49, Kosova & Bota CNA

Arabia Saudite paralajmëron "Netflix"-in për shkeljen e

Shtetet Arabe të Gjirit kanë kërkuar që "Netflix" të heqë të gjithë përmbajtjen që konsiderohet se shkel "vlerat dhe parimet islame dhe shoqërore", raportojnë mediat saudite.

Materialet e fundit, duke përfshirë atë të bërë për fëmijët, bien ndesh me rregulloret, paralajmëruan në një deklaratë mbikëqyrësit e medias saudite dhe të Këshillit të Bashkëpunimit të Gjirit.

Televizioni shtetëror saudit shfaqi video “me blur” (ku pamjet të mos duken qartë) nga shfaqja e animuar Jurassic World: Camp Cretaceous, në të cilën dy vajza adoleshente rrëfejnë se e duan njëra-tjetrën dhe puthen.

Pamjet nga filmi i diskutueshëm francez, "Cuties", u shfaqën gjithashtu në raportin e "Al Ekhbariya TV", së bashku me një mbishkrim që akuzon "Netflix"-in se kjo kopertinë kinematografike përcjell mesazhe imorale që kërcënojnë edukimin e shëndetshëm të fëmijëve.

Një video tjetër në faqen e internetit të "Al Ekhbariya" pretendonte se shërbimi i transmetimit po "promovonte homoseksualitetin duke u fokusuar tepër te homoseksualët".

Kanali intervistoi gjithashtu disa personazhe publikë me të cilët hodhën akuza të ngjashme dhe u bëri thirrje autoriteteve të marrin masa të menjëhershme.

"'Netflix' u kontaktua për të hequr këtë përmbajtje, duke përfshirë përmbajtjen e drejtuar ndaj fëmijëve dhe për të siguruar respektimin e ligjeve", thuhet në deklaratën e përbashkët nga Komisioni i Përgjithshëm Saudit për Mediat Audiovizive dhe Komiteti i Zyrtarëve të Mediave Elektronike të GCC .

Autoritetet do të ndjekin respektimin e direktivave dhe "në rast se përmbajtja cenuese vazhdon të transmetohet, do të merren masat e nevojshme ligjore", paralajmëruan ata.

Nuk pati asnjë përgjigje të menjëhershme ndaj akuzave nga "Netflix".

Megjithëse Arabia Saudite, e sunduar nga myslimanët sunitë, nuk ka ligje në lidhje me orientimin seksual ose identitetin gjinor, marrëdhëniet seksuale jashtë martesës, duke përfshirë seksin homoseksual, janë rreptësisht të ndaluara.

Sipas interpretimit të vendit të ligjit islamik, sjellja seksuale konsensuale e të njëjtit seks dënohet me vdekje ose fshikullim, në varësi të seriozitetit të perceptuar të rastit.

Në prill, kinematë në Arabinë Saudite nuk e shfaqën filmin "Doctor Strange" në Multiverse of Madness pasi "Disney" refuzoi një kërkesë nga autoritetet saudite për të shkurtuar atë që ata e quajtën "referencat LGBTQ".

Dhe filmi i animuar "Lightyear", i cili shfaqte një puthje të të njëjtit seks, thuhet se u ndalua në mbretëri dhe Emiratet e Bashkuara Arabe në qershor.

Ndërkohë, "YouTube" u akuzua muajin e kaluar nga autoritetet saudite se kishte lejuar "reklama të papërshtatshme" që shkelnin vlerat islame./ CNA.al