Zv/kryeministrit të Kosovës nuk i lejohet pjesëmarrja në një konferencë në Beograd

2022-10-27 20:55:50, Kosova & Bota CNA

Zv/kryeministrit të Kosovës nuk i lejohet pjesëmarrja në

Zëvendëskryeministri i Kosovës, Besnik Bislimi

Zëvendëskryeministri i Kosovës, Besnik Bislimi nuk u lejua nga autoritetet serbe të marrë pjesë në një debat në kuadër të Konferencës së Sigurisë në Beograd e organizuar nga Forumi për Marrëdhënie Etnike.

Zoti Bislimi ishte rreth 100 kilometra afër Beogradit kur, siç tha, autokolona e tij u ndalua nga policia e cila tha se “nuk mund të vazhdoje rrugën më tej për shkaqe sigurie”.

Zëvendëskryeministri Bislimi i cili është edhe kryenegociator i Kosovës në bisedimet me Serbinë të ndërmjetësuara nga Bashkimi Evropian, do të duhej të fliste në debatin me temën “Kosova dhe Serbia – si të shmanget qorrsokaku”.

Pas kthimi në Kosovë ai tha se pengimi i pjesëmarrjes së tij në konferencë dëshmon se “Serbia nuk është e gatshme të punojë për normalizimin e marrëdhënieve me Kosovën”.

“Është pak absurde që një konferencë për sigurinë, Serbia publikisht e pranoi se ka elemente kriminale që duan ta cenojnë sigurinë dhe e pranon se është e dobët për të ofruar siguri për pjesëmarrësit”, shtoi ai.

Organizatorët e konferencës thanë se janë respektuar tërë procedurat për vizitat e ndërsjella të zyrtarëve të Kosovës dhe Serbisë të vendosura në kuadër të bisedimeve në Bruksel.

Autoritetet serbe nuk kanë dhënë ndonjë hollësi rreth vendimit të tyre, ndërsa Dushan Janjiç nga Forumi për Marrëdhënie Etnike tha se “ky është një mesazh i keq për qytetarët e Serbisë që një aparat i shtrenjtë nuk mund t’i ofrojë siguri njeriut që ka ardhur për të diskutuar për ardhmërinë evropiane të rajonit”.

Zoti Bislimi tha se kishte për qëllim që “Beogradit dhe korit diplomatik por edhe qytetarëve atje t’iu ofrojmë versionin e Kosovës mbi zhvillimet mes dy vendeve.

“Ju e dini që qytetarët në Serbi i janë ekspozuar një propagande shumë të tmerrshme nga qeveria e Serbisë dhe një të vërtete të shpikur rreth zhvillimeve edhe në Kosovë edhe në dialogun me Serbinë”, tha zëvendëskryeministri Bislimi.

Pengimi i pjesëmarrjes së tij në konferencë ndodhë në një periudhë acarimesh mes dy vendeve, ndërsa afrohet afati i vendosur nga qeveria e Kosovës për konvertimin e targave të makinave të lëshuara nga Serbia me ato të Republikës së Kosovës, ndërsa diplomatët perëndimorë janë vënë në përpjekje për të gjetur një zgjidhje që do të shmangte tensionet ndërmjet palëve./ VOA