“Salillari”, Tomorri: Konfiskohet i gjithë objekti/ Dëm 30 milionë euro, përplasje shumë e fortë me qeverinë

25 Shkurt 2023, 08:26, Ekonomi CNA

“Salillari”, Tomorri: Konfiskohet i gjithë objekti/ Dëm 30

Gazetari Klodian Tomorri, për refuzimin e padisë nga Gjykata Administrative, të biznesmenit Pëllumb Salillari për katet pa leje të pallatit në zonën e Liqenit të Thatë, ku kërkohej shfuqizimi tërësisht i vendimit të Këshillit Kombëtar të Territorit për konfiskim të objektit dhe marrjen e masës së sigurimit të padisë, sqaroi vendimin e gjykatës.

Nga studio e "MCN Economy", Tomorri deklaroi se në objektin në fjalë për konfliktin Salillari-qeveri kemi të bëjmë me konfiskim total të objektit, jo vetëm të kateve pa leje, duke u konfiskuar i gjithë objekti.

Ai shtoi se në vitin 2020, mazhoranca ka ndërruar ligjin për menaxhimin e territorit dhe në të thuhet se nëse një subjekt ndërtues, në një objekt leja e ndërtimit shkelet mbi 10% të sipërfaqes dhe ka shtesë si të kateve dhe volumit anësor, objekti konfiskohet i gjithi, ndërsa për rastet e tjera kemi pasur konfiskim të kateve pa leje.

“Aty flitet për një objekt që vlen mesatarisht 20-30 milionë euro me vlerë tregu. Në lojë janë shumë para, nuk është vetëm shtesa pa leje, por bëhet fjalë për gjithë objektin.

Dje gjykata rrëzoi kërkesën e Salillarit për sigurimin e padisë, që të pezullohej procedura deri në gjykimin në themel të çështjes.

Ajo që kemi sot të sigurtë dhe të qartë nga zhvillimet e deritanishme është se mes qeverisë, Kryeministrit Rama dhe biznesmenit Salillari, një nga përfituesit më të mëdhenj të kontratave publike, kemi një konflikt apo situatë të agravuar.

Me sa duket qeveria është e bindur të vazhdojë deri në fund me konfiskimin e objektit, nëse dhe gjykata do ta konfirmojë atë që thotë qeveria, bëhet fjalë për një goditje të fortë.

Ne dimë nga praktika se ligji në Shqipëri zbatohet në mënyrë selektive kur do qeveria. Ka biznese ku ligji zbatohet i rregullt, ka të tjera, ku ligji zbatohet siç duhet.

Kemi një përplasje të fortë se janë shumë para në lojë, dëm që shkon në 30 milionë euro. Kjo nuk është më konflikt apo përplasje e thjeshtë, por përplasje ku ka shumë para.

Fakti që qeveria po vazhdon në drejtimin e saj dhe biznesmeni në drejtimin e tij, tregon që ka një përplasje shumë të fortë.

Mbas vendimit për bllokimin në fillim, pati marrë nja dy kontrata në KESH dhe tek ARRSH, këto janë dy të fundit.

Jemi në një situatë ku gjykata e ka parë të padrejtë kërkesën e kompanisë për pezullim padie.

Shumë shpejt do të jetë gjykimi i çështjes në themel që do të japë vendimin përfundimtar, por kam përshtypjen se qeveria do të vazhdojë përpara me konfiskimin e objektit dhe përdorimin për qëllimin që ka.

Nëse qeveria konfiskon ndërtime në shkelje të lejes në mënyrë substanciale nuk e shoh si aspekt negativ, se vende të tjera janë shumë më të ashpra.

Ajo që duhet të shohim dhe këmbëngulim është që ligji të zbatohet njëlloj për të gjithë dhe jo me një standard për një subjekt dhe me një standard tjetër për një biznes tjetër.

Se kemi parë edhe objekte të ndryshme që legalizohen në tejkalim të lejes. Të gjithë duhet të luajnë sipas të njëjtave rregullave.

Shteti duhet të jetë më i ashpër ndaj ndërtimeve pa leje. Pjesa tjetër negative është e dhënies së lejeve, se këta i shkruajnë vetë katet që duan.

Shtesat ndodhin pasi këta e japin lejen sa duan, por pasi u shiten këto kate, shtojnë dhe ca kate pa leje”, shprehet Tomorri.

Lidhur me procesin, Tomorri tha se nuk sheh ndonjë kosto shqetësuese për buxhetin, por se është kostoja e një procesi gjyqësor që paguhet nga qytetarët.

Ai sqaroi se në rastin konkret kemi të bëjmë me një gjyq ku përfitimi që pretendon shteti është 30 milionë euro dhe se ky do të jetë proces gjyqësor që do marrë formë të prerë në Apel.

“Nëse do kalojë në pronësi publike për strehim social apo për institucione publike apo do jetë kompania që do ruajë të drejtën të ruajë pronësinë e objektit.

Kompania pretendon se ne nuk jemi në kushte që të na merret i gjithë objekti, nuk kundërshton që ka shkelje. Pastaj do vendosë gjykata.

Ky është rasti i parë i përballjes mes shtetit me ndërtuesin, ose si rasti i parë ku qeveria thotë se unë e kam seriozisht me ndërtimet pa leje dhe kushdo që shkel do përballet me këtë ndëshkim.

Tani duhet të shohim a do jetë metri i njëjtë për të gjithë”, ka thënë më tej ai.

Sipas tij, për ndërtimet pa leje Kodi Penal e ka të përcaktuar qartë dënimin me 8 vite burg, por se problemi është që "metri" të jetë i njëjtë për të gjithë./CNA.al