web counter
LEXO PA REKLAMA!

SHKARKO APP

App Store
Google Play

Ngecin investimet publike, 50 mln € më pak se në 2021-shin

31 Gusht 2022, 21:30, Ekonomi CNA
Ngecin investimet publike, 50 mln € më pak se në 2021-shin
Foto ilustruese

Projektet e qeverisë në investimet publike kanë pasur ritëm të ngadaltë këtë vit.

Sipas të dhënave të siguruara nga Ministria e Financave, për gjysmën e parë të vitit shpenzimet kapitale rezultojnë të jenë realizuar 94 milionë euro më pak se plani i miratuar në buxhet dhe 50 milionë euro më pak se një vit më parë.

Projektet me ecurinë më të dobët janë ato në infrastrukturën rrugore, që menaxhohen nga Autoriteti Rrugor Shqiptar.

Fondi në buxhet për investimet në rrugë për këtë institucion është 250 milionë euro. Deri në fund të qershorit, Autoriteti Rrugor ka dhënë vetëm 35 milionë euro për projektet, sa 15% e totalit të buxhetit të vënë në dispozicion për gjithë vitin.

Projekti që ka pasur ecurinë më të mirë në infrastrukturës është ndërtimi i Tunelit të Llogarasë. Kjo vepër menaxhohet nga aparati i Ministrisë së Infrastrukturës. Shpenzimet në buxhet për gjysmën e parë të vitit për këtë vepër janë 15 milionë euro dhe zënë 40% të planit vjetor.

Aparati i Ministrisë së Infrastrukturës ka dhënë 3.8 milionë euro për kontratën koncesionare të rrugës së Arbrit, nga 25 milion euro që parashikohet për këtë vit, ndërsa financimet më të ulëta i ka marrë projekti koncesionar për ndërtimin e rrugës Dukat-Orikum. Për këtë vepër janë shpenzuar 650 mijë euro nga 2.6 milionë euro të parashikuara.

Edhe projektet që menaxhohen nga Fondi Shqiptar i Zhvillimit nuk kanë pasur ecuri të mirë. Fondi ka në dispozicion një buxhet prej 155 milionë euro nga ku janë disbursuar vetëm 50 milionë euro.

Në përputhje me planin ka qenë vetëm ecuria e fondeve të rindërtimit, të cilat për herë të parë këtë vit rezultojnë me vetëm 20 mijë euro mos realizim./euronews

 





Lajmet e fundit nga