Interesat e kredisë për shtëpi në lekë prekin nivelin më të ulët që prej nëntorit 2022

24 Korrik 2024, 08:20, Ekonomi CNA

Interesat e kredisë për shtëpi në lekë prekin nivelin

Foto ilustruese

Normat e interesit të kredisë për shtëpi në lekë po vazhdojnë rënien dhe kanë prekur nivelin më të ulët prej një viti e gjysmë.

Sipas statistikave nga Banka e Shqipërisë, norma mesatare e interesit të portofolit të kredisë për blerje banesash nga individët në lekë për muajin maj zbriti në 4.59%, ndërsa në të njëjtën periudhë të një viti më parë shënonte nivelin 5.21%. Norma mesatare e interesit e portofolit të kredisë për shtëpi në lekë ka prekur nivelin më të ulët që prej nëntorit 2022.

Rënia e normave të interesit është e dukshme edhe në kreditë e reja të dhëna gjatë periudhës. Për majin, kreditë e reja për shtëpi në lekë u dhanë me një normë mesatare interesit prej 3.95%, niveli më i ulët që prej gushtit të vitit të kaluar.

Rënia e normave të interesit i kanë dhënë një shtysë të re rritjes së kredisë për shtëpi. Të dhënat e Bankës së Shqipërisë tregojnë se në fund të muajit maj portofoli i kredisë për shtëpi arriti vlerën e 194.3 miliardë lekëve, në rritje me 13% krahasuar me të njëjtën periudhë të një viti më parë.

Kredia e re e disbursuar gjatë pesë muajve të parë të vitit arriti në afërsisht 23 miliard lekë, 17% më shumë krahasuar me të njëjtën periudhë të një viti më parë. Shtysa ka ardhur e gjitha nga kredia e re në lekë, që për 5-mujorin 2024 është dyfishuar krahasuar me 5-mujorin e parë të vitit 2023.

Burimi: BSH

Frenimi i rritjes së normave të interesit nga Banka e Shqipërisë gjatë vitit të kaluar ndikoi në rënien e yield-eve dhe e bëri më tërheqëse kredinë në monedhën vendase.

Ndërkohë, në muajin korrik Banka e Shqipërisë e uli normën bazë të interesit për herë të parë që nga viti 2020, duke krijuar premisa për ulje të mëtejshme të kostove të financimit.

Ndërkohë, norma mesatare e interesit të portofolit të kredisë për blerje banesash nga individët në monedhën euro ngelet në nivele më të larta. Në muajin maj, norma mesatare e interesit e kredisë për shtëpi në euro arriti në 5.34%, nga 4.75% që kishte qenë një vit më parë.

Megjithatë, edhe për kredinë në euro rritja paraqitet më e ngadalësuar në pjesën e parë të këtij viti, duke reflektuar ndryshimin e kursit të politikës monetare nga Banka Qendrore Evropiane në treguesin benchmark, Euriborin 12-mujor.

Diferenca mes normës mesatare të interesit për kreditë në euro dhe ato në lekë ka arritur nivelin më të lartë historik, me 0.75 pikë përqindje më shumë.

Muajin e kaluar, Banka e Shqipërisë vendosi për herë të parë aplikimin e një shtese kundërciklike në raportin e mjaftueshmërisë së kapitalit të sektorit bankar.

Të gjitha bankat tregtare në Shqipëri duhet ta plotësojnë këtë shtesë pas një viti, duke filluar nga data 30 qershor 2025. Një shtesë e tillë ka si qëllim ngadalësimin e kreditimit, veçanërisht në segmentin e financimit të pasurive të paluajtshme./ Monitor.al